豆豉蒸排骨 ( 3-SEP-2018 )

( 3-SEP-2018  MON )

今朝又熱番啲咁喎   最緊要唔好落雨就得㗎喇 ~

早餐食芝腿治   尋晚已經諗定添呀   無啦啦勁想食囉 ~



菇場唔太忙   咁就好喇   因為西瓜放大假   老闆兩公婆又出 Trip   大粒又唔喺度   爽爆呀 ~

幾快又到 9 月



Lunch Time 出去幫里奧大人整對皮鞋   之後再買墨丸麵番菇場食 ~

里奧大人今晚約朋友食飯   咁我放工就去探大姑奶   佢感冒未好   咁我去唐記買咗盒肉餅飯同 2 個菜肉包   再買多 Pack 排包比佢   咁呢兩日都應該有嘢落肚呢 ~

估唔到兒生仔同女朋友都去咗佢屋企   不過佢哋係去拎嘢   之後就去女朋友屋企食飯 ~

之後傾多幾句就走喇   番到屋企都 7 點幾   快快手煮飯喇 ~

今餐勁方便簡單   只係蒸熱就搞掂   咁上星期醃咗啲排骨   今晚點都要食埋去啦   所以一碟蒸哂所有嘢   哈哈 ~

拖埋地就食飯   食完飯就再抹嘢   之後開機洗衫同沖涼 ~

里奧大人 9 點幾番到屋企   佢好開心話唔該哂我   因為姑奶 Whatsapp 比佢話我買飯比佢食同關心佢   好感動喎 ~

佢哋唔知我會咁做㗎   所以佢哋好有驚喜同感動囉   而我覺得我做就會做   唔駛特登講出來   因為我唔知自己做唔做到   倒不如做完先講囉 ~

好記得之前培靈會有個信息係話要關心埋唔鍾意嘅人   我依家終於做到啦   感恩感恩 ~

而最開心係我真係好甘心樂意咁做   呢一刻覺得嬲一個人真係好花力氣   原來一個人開心   換來係好多人開心   呢下就真係最滿足呢 ~

我感覺自己生命已經改變   期望可為主做一個好好嘅見証 ~

今晚里奧大人同朋友食飯   當中又學會點樣祈禱   原來我哋發現仲係信心唔夠   所以又要繼續努力學習喇 ~

睇多陣電視   11 點幾都瞓 lu ~