生記山西刀削麵 @ 官塘 ( 11-JAN-2020 )

老壇酸菜魚飯 ($58)

蘭州牛肉湯麵 ($45) - 里奧大人要小辣   但佢話越食越辣   哈哈

( 11-JAN-2020  SAT )

今朝約咗家姐食早餐   所以 7 點 15 分都起身喇   里奧大人今朝都要番工   佢以為係自己鬧鐘響   但無理由我會早起身過佢   因為佢唔知我約咗家姐食早餐呢 ~

咁我刷牙啦   我聽到佢打電話同人講嘢   之後聽到佢講姐夫個名   再話同埋我哋一齊食早餐   想幫家姐整張漫遊電話卡 ~

搞掂哂就出門口   今朝去 Toast Box 食早餐 ~

家姐 8 點鬆啲到   之後佢同我講   話頭先收到里奧大人電話   但聽唔到電話   佢再打番比里奧大人嘅時候   隻手係咁震   仲要無人聽   嚇到佢以為我有咩事   已經諗定今日唔番工   有咩車去醫院最快   又話唔知同唔同姐夫講好   哈哈哈哈   我話我都唔知里奧大人約咗佢㗎   同埋我哋刷緊牙   聽唔到電話呀 ~

醒神全餐 (煎蛋 / 蕃茄 / 茄汁焗豆 / 多士及煙肉 / 香腸配南洋熱咖啡) ($48) & (+$5 配通粉)

醒神全餐 (煎蛋 / 蕃茄 / 茄汁焗豆 / 多士及煙肉 / 火腿配南洋熱咖啡) ($48)

肉鬆厚土司套餐配 2 隻半熟蛋 / 南洋熱咖啡 ($45)

里奧大人即幫家姐整張漫遊卡   但整唔到呀   佢又趕住番工   今晚再遙距教佢點搞   哈哈 ~

咁里奧大人要走先   我同家姐繼續食繼續傾 ~

食完就一齊搭車   各自番工喇 ~

菇場唔忙   可以做自己嘢 ~

放工搭巴士去深水埗   里奧大人未咁早到   咁我又買咗件牛仔布嘅裙   雖然只係 $119   但其實無諗住買   我拎嚟睇嘅時候   店主好熱情又拎埋另一隻顏色比我   再比直身鏡我照下   咁唔買好似唔係咁好咁   不過店主都好有禮貌   都值得幫襯一下   哈哈 ~

之後再行下等里奧大人   原來佢落車方向唔同我   雖然大家都係北河街   所以我話喺地鐵站入面等好啲   佢差唔多 2 點幾就到   咁去食嘢先喇 ~

我想去寶島古早牛肉麵   但唔記得喺邊   之後就周圍行去搵食   一連幾間都唔啱   所以同里奧大人講話行另一邊   但里奧大人話行埋先囉   反正都嚟咗   好在里奧大人話行埋咋   原來前面就係寶島古早牛肉麵   感恩感恩 ~

招牌珍珠奶茶 ($24) - 無咩味道

鹽酥雞扒乾拌麵 ($56) - 我想食乾撈   但唔記得上次係咪食呢個   哈哈

撈埋一堆

招牌半筋半肉湯麵 ($62) - 里奧大人話記得上次食呢個麵   覺得好食   所以又再叫

宜蘭迷你蔥肉餡餅 ($28) - 仍然係咁好味道呀

食完就去黃金行陣   之後再去高登買兩張華為 NM 記憶卡 128G   每張 $398    我哋覺得係貴   但我話始終覺得啲相放喺記憶卡入面係穩陣好多   之後我話送張比里奧大人啦   出咗雙糧嘛   大家開心   哈哈 ~

買完就去德福攞皮褸同波鞋   之後即番屋企喇 ~

抖陣到 7 點就去食嘢   食完都番屋企做下家務   沖埋涼就開機洗衫   搞掂就同里奧大人一齊睇戲 ~

睇到差唔多 11 點幾   里奧大人瞓先   我就 12 點先瞓 ~