Babymama: 金坊泰國美食 @ 紅磡 ( 25-JAN-2020 初一 )

2020年1月25日星期六

金坊泰國美食 @ 紅磡 ( 25-JAN-2020 初一 )

馬拉盞炒通菜 ($84) - 好味道真係好鍾意食馬拉盞炒通菜哈哈

酸辣無骨鳳爪 ($84) - 都夠酸辣

青芒果絲沙律 ($84) - 呢個沙律又係好開胃

青檸汁燒豬頸肉 ($96) - 正呀剪髮表妹次次都會叫呢個餸

雜錦併盤 - 蝦餅 + 魚餅 + 春卷 + 香葉包雞 ($112) - 我叫㗎唔想諗咁多

香辣肉碎炒飯 - 我無食呀

菠蘿炒飯 - 婆婆鍾意食咁實要叫啦

燒鰂魚 ($110) - 剪髮話要食魚呢個等咗 30 分鐘因為即叫即燒

( 25-JAN-2020 SAT 初一 )

今朝里奧大人要番工我就瞓到 10 點 20 分都醒咗刷埋牙就即去食早餐喇 ~

火腿扒芝士漢堡包餐我之前做咗麥樂會同媽咪會會員咁問佢有咩優惠 ?! 佢話一張要 $28 先送朱古力奶另一張就要食套餐咁我即係有杯朱古力奶啦無理由做咗會員唔用佢啲優惠家嘛反正屋企無煲水有杯嘢飲都好吖嘻嘻

食完番屋企抖陣之後就大清潔梳化同櫃桶 ~

搞掂哂就熨衫熨咗一大半里奧大人話 1 點可以放工咁我即刻沖涼換衫喇感恩啱啱好有車可以 1 點前去到里奧大人公司最搞笑佢以為我要 1 點半先到無諗過我會咁快呢 ~

本身約咗剪髮表妹 4 點去婆婆屋企我話我應該 3 點半都到婆婆屋企叫佢快啲出嚟哈哈 ~

差唔多 2 點左右食嘢之後行陣 AEON 行到 3 點左右都走人喇 ~

珍寶黑椒牛肉飯 ($65)

馬鈴薯蓉 + 焦糖香軟雪糕 (+$23) - 我突然間好想食薯蓉呢個好味道

依家里奧大人會記得我鍾意食焦糖香軟雪糕

一去到婆婆屋企見到大食喺婆婆間房走出嚟真係嚇死我因為我以為佢同阿妹一齊嚟嘛 ~

婆婆屋企一定有金莎不過上年婆婆比咗一盒大嘅比我我依家仲食剩十粒見到金莎有啲驚哈哈

無耐剪髮表妹同阿姨都到咗之後大眼表妹一家大細又嚟埋家姐姐夫就 4 點幾到 ~

傾下傾下剪髮表妹問大表咁耐嘅?! 我以為自己聽錯之後問佢講咩佢話大表咁耐嘅 ?! 我同大眼表妹都比佢嚇到 O 哂咀大表嚟咗好耐喇喎 ~

之前佢又唔知講咩家姐同大眼表妹都一齊問點解 ?! 因為覺得佢講嘅嘢好奇怪鬼咩成日唔夠瞓唔溫溫燉燉先奇呀 ~

大眼表妹個女好怕醜表妹話佢出門口前教個女講恭賀說話要佢肯講先會帶佢出街點知佢只叫咗一聲太婆之後全程無出過聲表妹夫話佢啲親戚以為佢個女係啞㗎哈哈 ~

佢個女勁搞鬼咁講開幼稚園放假放到 2 月17 日表妹話佢奶奶就驚喇因為無覺好瞓話佢會揭起奶奶嘅眼皮睇下佢瞓咗未 ?!?! 而瞓咗就會拍塊臉話睇下瞓咗未 ?! 咁真係想瞓都難啦哈哈 ~

本身我諗住喺婆婆屋企坐陣之後就去家姐屋企食飯不過剪髮表妹係都要我咃一齊食飯咁就一齊食啦 ~

差唔多 6 點就出發食嘢點知婆婆跌親好在我扯住佢件衫咁跌落地都瀉咁啲力剪髮表妹話有嘢喺佢隻腳隻嚇到佢以為係咩嘢唉婆婆成日都好心急工人又推部輪椅喺門口但又唔係入嚟扶婆婆喎黐鬼線輪椅放好就即去扶婆婆吖嘛 ~

今餐係家姐同里奧大人請食飯咁婆婆拎咗幾次錢出嚟但無可能係佢請囉 ~

同剪髮表妹一齊搭地鐵佢就出旺角我哋就直接番屋企 ~

番到屋企即沖涼之後睇下啲笑戲 ~

剪髮表妹送比我㗎雖然我依家唔係鍾意 Line 但見到佢嘅一番心意我真係感覺好開心呢