意式肉丸豆腐冬蔭功通粉 + 高麗菜豬肉水餃 + 粟米粒 ( 13-JAN-2020 )

( 13-JAN-2020  MON )

今朝起身又涼涼哋   遲啲又會話落毛毛雨   唔通新年會凍 ?!

早餐食吞拿魚治烘底   酸酸哋開胃啲 ~

菇場忙咗一輪又可以做自己嘢   呢幾日係無政府狀態   要好好享受一下先   哈哈 ~

同里奧大人食 Lunch   食完再買埋生果就即番菇場喇 ~

蔥油蒜香骨飯 ($47)

窩蛋牛肉飯 ($29)

忙下停下   好快放工   準時走人 ~

好早番到屋企   可以慢慢預備   因為大家都唔係咁餓    所以 7 點先開餐 ~

是日懶餐 - 意式肉丸豆腐冬蔭功通粉 + 高麗菜豬肉水餃 + 粟米粒  

意式肉丸豆腐冬蔭功通粉 - 板豆腐原來今日到期   好在記得咋   冬蔭功湯底係過期一個月   好在無變壞咋   呢個湯底原來好鬼辣 ~

高麗菜豬肉水餃 - 終於清哂喇   勁開心   依家鍾意一開咗嘅嘢就要盡快食哂去呢 ~

粟米粒 - 以為屋企有粟米湯   點知得粟米粒   咁開罐嚟食啦   今晚無買菜呀 ~

我洗洗下碗   里奧大人無啦啦話我有強迫症   我問佢點解咁講 ?!   佢話睇到電視話果個人成日覺得自己無鎖門喎   其實我不嬲都話自己有強迫症㗎   因為每晚都要按實個雪柜門   就算無開過都要入廚房按一按先安樂   有時瞓咗上床   都會起身按下雪柜門 (但其實根本無開過雪櫃)   好似前日明明鎖埋門   都要入番屋睇下雪櫃門關好未 (但其實無開過雪櫃)   基本上我每日都會按雪櫃門   真係摸門多過摸里奧大人呀   哈哈 ~

搞掂哂就抖陣   8 點去徑步   今晚徑 25 分鐘   之後再去超市買嘢就番屋企喇 ~

沖埋涼就開機洗衫   抖陣就熨兩機衫   咁熨埋里奧大人幾條褲   之後都要佢自己熨番   因為條腰開始痛喇 ~

今晚好攰咁   又覺得好鬼凍咁喎   所以 11 點都自己瞓先喇 ~