Mirch Masala 印度美食風味屋 @ 銅鑼灣 ( 24-JAN-2020 )

Mix Vegetable Pakora  雜菜咖哩角 ($45) - 係我衰   無睇埋英文   因為我記得咖哩角英文係 Samosa 嘛   點知一上枱   我都嚇一嚇呀

紅色係 BBQ 醬   今次就要蘸多啲醬汁   無咁熱氣呀

香料烤餅 Masala Naan ($25) - 超級好味   所以叫咗兩份

都好大塊

咖哩雞 Chicken Curry ($82) - 一放低嘅時候   我同里奧大人講話係咪比我哋伴烤餅食㗎 ?!   之後等多陣   仲唔見有咖哩雞   咁即係呢碗係咖哩雞啦

其實咁睇   真係唔知咩肉   哈哈哈哈

我無諗過咖哩雞咁細碗㗎   定係正宗印度嘅份量呀 ?!   不過好在味道都唔錯   食落有啲辣   但唔搶喉

Mango Lassi ($45) - 呢杯好飲呀   夠凍又有芒果肉   呢度飲杯汽水都好似 $40 呀   咁梗係唔飲啦   之後我話飲呢杯   因為我話好似同阿 Mi 食印度嘢嘅時候   係飲過一杯叫 Lassi 嘅嘢

好懷舊嘅 Drink Menu

( 24-JAN-2020  FRI )

尋晚瞓到 3 點幾熱醒呀   成條頸濕哂   所以要即刻起身沖涼囉 ~

今朝同里奧大人講話尋晚熱醒呀   佢話佢都係   但無我咁誇張   同埋問我做咩唔開風扇   係喎   完全唔記得可以開風扇   我以為係自己食完辣嘢先咁咋   哈哈 ~

天氣又濕又熱   真係好鬼難頂   但過兩日又話得 13 度   時冷時熱   真係要好好保重身體呢 ~

早咗搞掂就早咗出門口   車程又暢順   所以去敏華食早餐   居然要加一服務費   年三十晚咋喎 ~

菇場唔忙啦   可以抖下 ~

阿齋見我着短袖   就同阿爽話我好勇   之前咁凍都仍然短袖   阿爽話我奇奇怪怪添啦   佢哋熱嘅時候   我又會戴頸巾   哈哈哈哈   咁其實我都怕凍嘛   同埋剪短頭髮   驚條頸攝親嘛 ~

駛唔駛咁嘆呀

今日係年三十晚   所以 1 點可以放工   實在太開心喇 ~

去麥當勞買套餐番屋企食   食到 2 點 45 分   抖到 3 點就去接里奧大人放工喇 ~

脆辣雞腿包餐 ($27) - 我食完先睇張單   原來係中薯條   怪不得食極都仲有啦

3 點幾走人   咁搭巴士去銅鑼灣行花市   去到差唔多 4 點半   但里奧大人話餓   要食啲嘢喎 ~

鍋貼 + 熱豆漿 - 鍋貼唔熱嘅

餈飯 - 超級難食

食完行維園   今年夠哂特別   只得濕貨咋   今日仲落埋雨 ~

@ 維園

真係好少人行年宵呀

此路不通   依家點行都得

設有休息區

我其實覺得唔多人   但比我想像中多人呢

每個區城都有休息區

熟食檔都係冷冷清清   里奧大人見到有糖蔥餅   問我食唔食 ?!?!   我話唔食喇   因為睇到咁情況   有啲傷感

花與花嘅距離相當闊   唔知因為係尾聲   定係本身係咁   要是真係擺到咁就慘啦   以往睇花   真係插針都插唔入㗎

走人喇

希望下年會回復番以往人來人往   熱熱鬧鬧嘅維園啦

行咗陣就去行 SOGO   又係無咩人   咁再行埋超市   我唔明點解唔同季節去超市都一樣係咁焗   地方已經迫   人流又多   點解唔開大啲冷氣呢 ~

無咩人

得一個人搭扶手電梯

差唔多 6 點就去食晚飯喇   諗住去食韓國嘢   但去到商場門口又突然想食印度嘢   最搞笑我好留心睇緊 Menu 嘅時候   突然有人好大力咁搭張宣傳單張比我   嚇到我退後一步再叫咗一下呀   嚇到里奧大人唔知咩事   佢話嚇親佢呀   哈哈 ~

一入到間印度餐廳   老闆係印度人   同埋得一枱印度人   我估正宗啩   因為頭先一入去   成陣印度味呀 ~

食食下見到一枱鬼佬客   咁都好   即係有人會嚟食嘛 ~

食完就搭巴士番屋企   開埋機洗衫就沖涼   之後一齊睇戲 ~

今晚都 11 點半先瞓   其實唔眼瞓都想捐入被竇取暖   哈哈 ~