高麗菜豬肉水餃拚春卷 (外賣) + 忘不了白菜仔 + 蕃茄豆腐三文魚骨湯 ( 7-JAN-2020 )

( 7-JAN-2020  TUE )

今朝里奧大人起身   我都醒醒哋   以為 7 點半啦   望下鐘原來係 7 點 10 分   咁我繼續瞓喇   但又瞓唔到   所以起身同里奧大人一齊食早餐   今次真係大把時間慢慢嘆喇   哈哈 ~

菇場勁忙   話咁快就 Lunch Time ~

好想飲三文魚湯   所以就即去買食材 ~

首先睇有無三文魚先   無就唔駛行來行去買食材   見到仲有六份   我買完嘢番嚟唔會無哂呀嘛   所以打埋簿就即去惠康買板豆腐   再去買蕃茄同白菜仔   之後買埋朱古力奶就去買兩份三文魚喇 ~

行到幾乎出汗   所以番到菇場都 1 點   但無胃口食嘢住 ~

頭先買嘢平咗兩蚊雞   買薑 $11 平 $1 (我比 $100   佢都費事搵咁多散紙)   咁買蕃茄 + 白菜仔總共 $21 又平 $1 (我得番十蚊同廿蚊紙)   因為依家好多都唔會平比妳㗎   所以覺得平咗好開心   哈哈 ~

終於 1 點 45 分先有啲胃口食   今日都係食 Flakes + 朱古力奶   因為唔想洗嘢   哈哈 ~

菇場無咁忙喇   但仍然手不停 ~

放工即走   番到屋企都即預備喇 ~

是日晚餐 - 高麗菜豬肉水餃拚春卷 (外賣) + 忘不了白菜仔 + 蕃茄豆腐三文魚骨湯

高麗菜豬肉水餃拚春卷 (外賣) - 煮嘅時候好餓   所以想食餃子   最後食剩 5 隻   要抖陣先再食得落 ~

忘不了白菜仔 - 想食啲菜   所以點都要煮少少食囉 ~

蕃茄豆腐三文魚骨湯 - 第一次滾呢個湯   材料係 4 個蕃茄 + 1 盒板豆腐 + 1 份三文魚骨   但今次加多咗水   所以無咩蕃茄味   下次要再試過 ~

洗埋碗就抖陣   8 點 45 分出去徑步 ~

今晚好飽   所以要徑 30 分鐘呀 ~

番到屋企即沖涼   之後睇電視   11 點 15 分都瞓覺 lu ~