韭菜餃子 (外賣) + 炸魚皮 (外賣) + 小旺菜 ( 12-JUN-2020 )

( 12-JUN-2020  FRI )

今朝里奧大人同我食早餐   因為佢要幫公司拎嘢   所以陪我食喎 ~

里奧大人話瞓得唔好   嚇得我以為乜事   原來係因為公司好多嘢要安排   太多突發事喇   所以我都話講出來一齊研究下   局外人應該睇得清楚啲嘅   哈哈 ~

食完就番工喇   唔知係咪飲咗凍嘢   個人真係無咁熱 ~

菇場忙呀   今星期都比較忙 ~

咁家姐打嚟傾偈   之後佢又話因為架車問題而瞓得唔好呀   唔係咁搞笑呀嘛   里奧大人今朝又話瞓得唔好   兩個講嘅嘢又係一樣嘅   佢哋好多時都係咁   一係就同一時間打來搵我 ~

Lunch Time 同阿花一齊搭 Lift   之後問我食咩 ?!   我話其實食 Flakes   但想出去曬下   呢排周身骨痛   之後佢話佢都係呀   咁我都無咁驚喇   哈哈 ~

仍然忙呀   好快放工 ~

去街市買餸   順便買定啲節瓜同角瓜   咁我買兩條角瓜   我一拎個袋   有條角瓜趺落地下一分為二   原來佢個袋係爛咗好大個窿   咁我唔要果條啦   佢話要啦   我話我唔係今晚食喎   我再買另一條 ~

買完即番屋企   好熱呀 ~

今晚里奧大人 7 點鬆啲番到屋企   可以即刻開餐喇 ~

是日懶餐 - 韭菜餃子 (外賣) + 炸魚皮 (外賣) + 小旺菜

韭菜餃子 (外賣) - 我唔想煮飯呀   所以又買餃子 ~

炸魚皮 (外賣) - 好耐無食   今次一定要買來食喇 ~

小旺菜 - 本身 $15/2棵   我諗緊買唔買好   正想再行去買嘅時候   我聽到話轉 $12   咁等佢轉咗位置再叫十二蚊先買   感覺慳咗 3 蚊雞   哈哈 ~

沖埋涼就抖喇   出完一身汗   真係好攰呀 ~

里奧大人熨衫   佢話好攰   今晚要早瞓   我話留番我熨啦   佢又話唔駛 ~

我睇 youtube   里奧大人 10 點 15 分瞓覺   我其實都超級眼瞓   所以 10 點 29 分都瞓覺喇   真係勁早呀   哈哈哈哈 ~