燒汁五花腩片 + 蒜蓉蒸節瓜 ( 16-JUN-2020 )

勁多肥豬肉

( 16-JUN-2020  TUE )

尋晚瞓到半夜起身去廁所   之後幾難先瞓得番呀 ~

早餐食芝腿治烘底   好味道 ~

菇場忙下停下   不過今日有啲攰   做嘢比較慢   哈哈 ~

Lunch Time 出去一田買泡菜   再去埋鴻福堂換糉   之後即去買牛什河番菇場食 lu ~

放工即走   今晚等咗好耐巴士呀   所以番到屋企即刻整啫喱   之後就預備晚餐喇 ~

里奧大人 7 點幾先番到屋企   我啱啱好搞掂 ~

是日懶餐 - 燒汁五花腩片 + 蒜蓉蒸節瓜

燒汁五花腩片 - 入焗爐之前   我真係諗住開鑊慢火煎   但蒸完糯米飯同節瓜   我覺得好熱   最後諗起可以焗嘛   就即開爐焗   估唔到效果又唔錯喎   口感好 Juicy 呢 ~

蒜蓉蒸節瓜 - 諗住滾鹹蛋元貝節瓜湯   但又係因為覺得好熱   唔想飲湯呀   哈哈 ~

洗埋碗就即沖涼   食埋生果就休息喇 ~

我問里奧大人啫喱係點樣整啫喱㗎 ?!   佢話佢唔記得喇喎   我話好似唔駛用魚膠粉   之後佢又話真係唔記得呀   我話咁點呀 ?!   頭先整咗啲啫喱   點解仲好似水咁嘅 ?!?!   

之後佢問我用幾多水呀 ?!   我話跟包裝指示做法   用兩飯碗嘅水嘛   但我已經只用一碗半水咋喎   佢叫我比個飯碗佢睇   我即再睇清楚指示   原來只係 225ml 水   佢再叫我用量杯量 225 ml 嘅水倒落飯碗   只係飯碗 1/5 咋    笑到我死死下呀   我用咗 8 陪嘅水呀   哈哈哈哈 ~

等我頭先仲話指示話用飯碗   咁我咪用自己飯碗囉   里奧大人聽完反白眼   今次我覺得里奧大人好醒呀   哈哈哈哈 ~

我本身整芒果味   好在仲有盒提子味   拿拿趕整埋去喇   因為我唔想嘥咗啲荔枝呀 ~

整好之後就睇電視   一個鐘頭後再望下啫喱   真係凝固咗喇   勁開心   因為如果仲唔得   我就唔會再整呢 ~

今晚好攰呀   所以 11 點都瞓喇 ~