三杯馬蹄煎肉餅 + 菠蘿咕嚕肉 + 滷水雞全翼拚紅腸 (外賣) ( 8-JUN-2020 )

三杯馬蹄煎肉餅 + 菠蘿咕嚕肉 + 滷水雞全翼拚紅腸 (另+$16)

( 8-JUN-2020  MON )

尋晚鬧鐘響   我心諗   好似啱啱瞓着咋喎   點知原來係里奧大人教錯鬧鐘   尋日提佢拎 I-Money   佢話校咗鬧鐘   但原來係教咗 1:40am   真係論盡喇 ~

今朝我起身   里奧大人就去廁所   之後話發咗個夢   係夢見我走咗   但有隻狗同個細路仔陪住佢   之後行到街邊有個廟   隻狗趴咗喺地   點都唔肯走   因為佢知道自己時間已經夠   之後里奧大人白內障   咩都睇唔到好慘   因為隻狗走咗無人帶住佢呀   我即話發夢都想我死   佢即刻話佢老咗都係隻狗仔陪住佢咋   哈哈哈哈   我駁唔到佢添 ~

瞓得勁差   可能食咗炸雞皮太熱氣   個人成日好熱咁 ~

又落雨   真係無哂 Mood ~

早餐食芝腿治烘底   來來去去都係食呢啲   我又懶轉場   好在都鍾意食呢啲三文治咋 ~

菇場忙呀   要做埋長命 Report   諗住做完抖下   點知仍然繼續忙 ~

Lunch Time 食 Flakes + 朱古力奶   落雨濕濕唔想落街 ~

仍然忙下停下   今日 4 點 15 分先通知放 5 點   上次又係呢個時間通知   我同 8 卦都以為無得放早呀 ~

里奧大人 Whatsapp 話想同我出去淘大或者德福食飯   但我話落雨呀   唔好周圍去喇 ~

不過我都打算唔煮飯   今日勁攰   手指 腳板底同頸又痛   一句講哂真係周身骨痛呀   哈哈 ~

放工即走   買埋外賣就番屋企 lu ~

見里奧大人做緊公司嘢   咁我話沖埋涼先食飯喇 ~

食完就休息喇   我隻右手無啦啦又好痛呀   再摸下痛嘅位置   應該又網球手翻發呀   之後里奧大人幫我按摩   佢話我右手位置係腫咗呀 ~

睇多陣電視   今晚我 9 點 55 分都瞓覺喇   里奧大人個樣好愕然   再望下個鐘   我話我勁攰呀   所以今晚真係要早啲瞓   哈哈 ~