焗雜丸 & Rotfrukts Strips + 印尼鹹蛋撈麵 ( 6-JUN-2020 )

( 6-JUN-2020  SAT )

6 月 6 日星期六咁就好記喇   最怕係 1 月 2 日星期三咁   哈哈哈哈 ~

尋晚半夜係咁行雷   之後去廁所   幾難先瞓得番呀 ~

里奧大人今日番早   我 7 點半起身   佢就出門口喇 ~

今朝同 8 卦去大快活食早餐   咁我 Send 早餐比家姐睇   佢話以為我用里奧大人早餐相 Send 比佢喎   因為佢話我好少會食得咁豐富   哈哈 ~

菇場唔忙呀   咁寫下 Blog 啦 ~

咁我想寫番一田買嘢嘅價錢   咁睇番張單   原來收多咗 1 包香腸嘅錢呀   2 包係 $76.8   但佢嘟咗 3 包   另外一款味道就無錯價錢   咁即同番家姐講啦   估唔到家姐打去問   之後話可以拎得番 $54.8   最感恩係減咗 $54.8   張單總數都係 $1,005   唔駛比番張 $50 Cash Coupon   如果唔係只係拎番 $4.8   仲要搭番廿蚊巴士   簡直就係蝕呀   哈哈哈哈 ~

放工即走   見家姐已經拎咗 2 包韓國薯條   佢話平呀   我話唔好食㗎   唔好買啦   之後佢就放低   大佬   平都唔係咁買法嘛   之後行勻哂都真係無嘢想買   所以用唔到張 Cash Coupon   唯有下次再買啦 ~

差唔多 1 點半就去搵食   見到拉麵都唔錯   仲要係買一送一呀   我哋初初以為只係外賣   但原來堂食都係呀 ~

一坐低   里奧大人就打嚟話落車   咁都同家姐睇下有咩好食   家姐問里奧大人鍾意食咩 ?!   我話佢今次除咗炸嘢辣嘢唔食   其他都食   同埋佢鍾意食拉麵   所以幫佢叫埋都得 ~

屋台牛肉拉麵 (黑蒜湯底 & 豬骨湯底) ($78) - 買一送一超級抵   同埋份量都唔少喎   味道都唔錯   諗住買一送一都係普普通通嘛

咖哩吉列豬扒飯 ($48) - 呢個麻麻哋

原宿七味魷魚 ($36) - 一般啦

2 點半左右一齊去搭車   大家都係只等 3 分鐘就有車   感恩感恩 ~

我叫里奧大人番屋企先   我就去買蘋果同涼粉 ~

enry 蘋果喺百佳買架  依家特價只係 $20.9/3個   家姐話好抵   因為正價係接近 $9 一個   咁我即買 9 個啦   今次揀得好爽甜

番到屋企都即沖涼   之後執下嘢就休息喇   勁攰 ~

成個櫃桶都係即食麵   其實仲有個櫃桶係放通粉同拉麵之類   所以有時會唔記得食其他囉

里奧大人 3 點幾瞓   我又瞓唔到   所以睇 Youtube   佢瞓到 6 點先醒呀 ~

唔想食外賣   所以求其煮   焗嘢最好   無咁熱   哈哈 ~

其實唔太餓   但里奧大人話想早啲食早啲休息   所以 7 點唔夠都可以開餐 lu ~

是日懶餐 - 焗雜丸 & Rotfrukts Strips + 印尼鹹蛋撈麵

焗雜丸 & Rotfrukts Strips - 今次加咗燒汁   里奧大人無問啲丸熟未喎   呵呵   焗蕃薯條都幾好味   但就幾飽肚 ~

印尼鹹蛋撈麵 - 終於清哂最後兩包撈麵 ~

洗埋碗就開機洗衫   之後大清潔廁所   搞掂哂就沖涼 ~

里奧大人 10 點都瞓喇   我就 11 點幾先瞓 ~