鮮蝦雲吞 (外賣) + 昆明生菜 ( 10-DEC-2022 )

 ( 10-DEC-2022  SAT )

今朝一覺瞓天光   其實 7 點唔夠都醒醒哋   但都係繼續瞓到 7 點 45 分先起身 ~

早餐食腿蛋治烘底   好耐無食喇   覺得好好味 ~

菇場唔忙啦   仲靜英英添 ~

放工即走   去買菜再去買過橋米線番屋企食 ~

食剩半碗餸   可以留番今晚食

里奧大人 3 點前要番工   咁我都去買餸同去超市買嘢 ~

難得百佳有 9 折   咁原來我張信用卡過咗期   咁番屋企確認張新啦   點知原來係另一間銀行   激鬼死   不過最後無折都要去百佳買啦   我叫收銀幫我留起啲貨嘛 ~

買完都慢慢行番屋企   因為好鬼攰呀   我已經行咗 10,000 步   好在平路都 OK ~

番到屋企都已經 5 點   成日諗住星期六多啲時間喺屋企   點知自己甩甩漏漏激鬼死 ~

整下文件又 5 點半   我要出發去里奧大人公司喇   見到 Melody 同阿妹傾下   之後同皇太后又傾下   最後又同榴槤傾下   之後我要去番崇拜了 ~

崇拜完畢都番屋企休息   里奧大人 8 點幾先番到屋企   可以即開餐 ~

是日懶餐 - 鮮蝦雲吞 (外賣) + 昆明生菜

鮮蝦雲吞 (外賣) - 今晚煮寬粉   仲以為口感係煙韌添   我就食番過橋米線嘅餸   好在有留到個煳辣湯底咋 ~

昆明生菜 - 1 大棵只係 $4   咁都唔錯   唔駛又要番 ~

洗埋碗就開機洗衫   之後沖涼休息休息 ~

睇下 Youtube 都差唔多 11 點   醒起有世界盃   仲要係葡萄牙對摩洛哥   所以想睇喇 ~

我自己睇上半場先   同里奧大人講話點解 C 朗唔係 7 號球衣 ?!   里奧大人話咁奇怪嘅 ?!   之後我話摩洛哥踢得唔錯喎 ~

咁里奧大人睇下半場   即問我葡萄牙係咩色衫 ?!   我話紅色   仲叫佢睇下 7 號居然唔係 C 朗   之後紅衫贏波   鏡頭影住 C 朗個樣唔開心   我話係咪因為無出場呀 ?!   里奧大人就話鏡頭之後可能係笑呢 ?!

好喇   之後換人就見 C 朗出場   咁我再睇下賽果係 POR 0 || MOR 1   我同里奧大人講話原來係摩洛哥贏呀   葡萄牙係白色衫呀   哈哈哈哈   佢話我究竟睇緊乜㗎 ?!   C 朗出場都知係白色衫啦   我話真係望住佢樣   無望佢咩衫喎   我話如果我去買波就死   里奧大人好開心話妳依家咪贏咗囉   哈哈哈哈 ~

咁我再睇番葡萄牙隊以前嘅波衫   真係紅色嘛   我咪以為一世都係紅色衫囉 ~

睇完已經 1 點幾喇   我過咗時間瞓   唔係咁眼瞓    但點都要瞓啦   聽朝要早起身呀 ~