叉燒切雞飯 + 學斗 + 泡菜豚肉湯 ( 16-DEC-2022 )

( 16-DEC-2022  FRI )

又一覺瞓天光呀   感恩感恩   今朝 7 點 20 分都醒咗添呀   所以即刻整早餐呢 ~

早餐食醬占多   屋企整真係抵好多   但整早餐加洗埋嘢   前前後後都用咗唔少時間囉 ~

一番到菇場   船頭即同我講話尋晚搵唔到我要嘅拉麵   好感動呀   哈哈   感恩同同事相處愉快   始終真係對佢地多過對住老公   如果同事唔好都幾慘 ~

我着短袖 One Piece   肥仔豪即同我講話居然着短袖   我話好熱呀   之後溫總都話平時見我坐喺位話凍   但今日咁凍都着短袖   我話可能朝早沖熱水涼   咁又行番工就熱囉   平時坐喺度唔郁嘛   哈哈 ~

菇場忙下停下   望下鐘又已經 11 點 45 分了 ~

我問家姐   妳主人係咪喺房瞓覺 ?!   家姐即刻入房影主人   哈哈哈哈

Lunch Time 出去買菜   之後再去買炒麵   本來想行多陣   但落毛毛雨都係唔行 lu ~

唔忙又繼續傾 Skype 啦   咁樣啲時間過得快好多㗎 ~

Berry 識保暖過我   哈哈

放工即走   買埋韓國豆腐就番屋企喇 ~

番到屋企都即預備晚餐   今晚差唔多 7 點 10 分先有得食   最搞笑里奧大人話做咩搞咁耐 ?!   因為佢以為我就咁蒸翻熱就食得   我話叉燒要焗熱先好味嘛 ~

是日晚餐 - 叉燒切雞飯 + 學斗 + 泡菜豚肉湯

叉燒切雞飯 - 本身諗住整黯然銷魂飯   但我話唔整煎蛋   里奧大人就話即係得番銷魂飯   真係痴鬼線   之後我醒起有切雞   咁拚埋一碟做碟頭飯   但靈魂係蔥蓉   哈哈   其實之前買菜送嘅   唔係今晚就無蔥蓉食呢 ~

學菜 - 拿拿聲食埋呢半斤   好在無變冰菜咋  哈哈 ~

泡菜豚肉湯 - 之前醃咗豚肉   今晚點都要食啦   但唔想炒   所以又整個湯喇 ~

洗埋碗就開機洗衫   抖陣就同里奧大人去做運動喇 ~

沖埋涼就食橙   今次個橙好甜   所以叫里奧大人買多啲   哈哈 ~

睇埋尋晚未睇嘅 20 分鐘世界盃   我 11 點左右都瞓   反而里奧大人就繼續睇明珠台嘅蠍子王 ~