日和號壽司料理 @ 九龍灣 ( 9-DEC-2022 )

芝麻八爪魚軍艦 ($24) / 蟹籽軍艦 ($34) X 2

螺肉軍艦 ($22) / 芥辣八爪魚軍艦 ($24) X 2

劍魚腩壽司 ($38) / 稻荷蟹子沙律壽司 ($28) / 帆立貝壽司 ($48)

鱈場蟹捧壽司 ($32) / 鰻魚壽司 ($38)

( 9-DEC-2022  FRI )

今朝又係 7 點唔夠醒咗   但都繼續瞓下先   終於都係瞓到 7 點半   始終尋晚半夜去廁所   如果一覺瞓天光就會早啲起身咁囉 ~

早餐仍然食香芋瑞士卷   仍然覺得好味   最正係食完就咁洗隻碟就得   哈哈 ~

里奧大人話陪我去工展會   我以為聽錯   哈哈   因為佢對買嘢食嘅地方係完全零興趣   佢話想陪我行街   我話唔行工展會啦   加上又無咩嘢好買   如果純粹去睇就更加唔會去添 ~

菇場忙咗陣   之後 Hea 過喇 ~

Lunch Time 出去行陣   行咗半個鐘就買炸兩番菇場慢慢食 ~

仍然唔忙   準時放工 ~

約咗里奧大人去 Megabox   去到 6 點鬆啲   所以食埋晚餐先再行   因為呢段時間無咩人就最好 ~

里奧大人話去太興   我以為佢想食燒味   但佢話想同我食乳豬呀   不過我話食乳豬飯都可能要接近 $100   咁我話第時就咁買乳豬食仲好 ~

之後去日和號   見無咩人就入去啦   估唔到壽司同軍艦係半價添   咁樣就勁吸引喇 ~

食完去 Ikea   正入緊去 Ikea 嘅時候   聽見有個女人講話 "而家啲兩餸飯唔錯"   我真係即望下係咪有兩餸飯   因為我真係喺 "宜家" 嘛   我同番里奧大人咁講   佢都以為話 "宜家"   哈哈 ~

今次主要去 Ikea 買兩層抽屜櫃   只係 $199 咋   原價係 $499.9   所以忍唔住要買   因為數量有限   今晚一定要去買囉 ~

原來得番 3 個咋   仲要係 Display   不過無所謂   最緊要係唔駛自己番屋企砌呢 ~

買完就搭的士番屋企   里奧大人同的士司機好好傾   勁驚司機唔記得停車比我哋落呀   哈哈 ~

番到屋企就即刻抹個柜   之後放好哂啲嘢就開機洗衫 ~

沖埋涼就休息   差唔多 9 點半就同里奧大人睇 SPY X FAMILY~

睇到 10 點幾   咁諗住瞓   原來 11 點做世界盃   巴西 vs 克羅地亞   其實好想睇   但真係好眼瞓   所以睇咗 10 分鐘都瞓覺   叫里奧大人錄低   留番聽晚一齊睇 ~