黃豆醬蒸排骨 + 泡菜蛋炒飯 + 鹹蛋節瓜湯 ( 12-NOV-2023 )

( 12-NOV-2023  SUN )

今朝我遲咗少少出門口   一出大堂   有個男人拖住 2 隻柴犬   其中 1 隻撲我   啲牙仲掂到我隻手   個男主人勁唔好意思   管理員都話小心啲   之後佢 2 隻互吠   真正狗咬狗骨   哈哈 ~

里奧大人話因為見到我件衫係狗骨圖案   哈哈 ~

阿妹之前試咗個丁麵   佢都話好食   今朝我食鮮茄湯肥牛通粉   我同佢都覺得蕃茄湯都幾多料   所以佢下次會食   佢同我口味差唔多就最好   有時買嘢可以同佢 Share 食嘛

食完要即刻去里奧大人公司幫手喇   搞掂就可以同阿妹傾下偈 ~

皇太后話我今日着褲   麥師傅話唔係第一次   咁我話依家要帶住小朋友   所以着牌方便好多   麥師傅都話我成日都着裙   我話方便嘛   一穿就搞掂 ~

番完學之後就去事奉   差唔多 1 點先走 ~

今日去另一邊買菜同凍肉   點知無凍肉賣嘅   最後只係買咗節瓜同生果咋 ~

經過 HKTV Mall   見到 Dole 藍梅 $69.9/桶 (原價 $91) 好似幾抵   所以即問家姐抵唔抵 ?!   佢話都抵呀   所以即買 ~

買完之後即試 3 粒啦  1 粒甜 1 粒少酸 1 粒甜   哈哈哈哈   咁番屋企再洗 4 粒   但粒粒都甜呀   所以即刻再去買 ~

我一入去就拎起最後 1 桶藍莓   頭先剩 2 筒㗎   咁我比錢嘅時候   有個女人話就係想買筒藍莓   但我早佢一步買咗   之後職員話無哂貨喇 ~

里奧大人都話啲藍莓甜呀   真係好感恩可以買到 2 桶

里奧大人公司有突發事情要處理   所以我番屋企放低嘢就即刻趕去里奧大人公司 Stand-by   感恩有其他人幫忙處理   我同里奧大人就可以走得 ~

差唔多 3 點先去食下午茶   食完就番屋企   感恩突發事情已經搞掂咗   咁就唔駛再出去喇 ~

5 點半預備晚餐   但接近 7 點先開餐 ~

是日晚餐 - 黃豆醬蒸排骨 + 泡菜蛋炒飯 + 鹹蛋節瓜湯

黃豆醬蒸排骨 - 呢個餸又係簡單好味   又可以快啲清埋樽黃豆醬 ~

泡菜蛋炒飯 - 尋日午餐食剩嘅飯   唔想食白飯咁悶   所以整炒飯喇 ~

鹹蛋節瓜湯 - 唔想食菜就滾呢個湯   依家唔會落咁多水   唔想夜晚成日去廁所呀 ~

洗埋碗即沖涼   抖陣就熨 2 機衫 ~

9 點鬆啲同里奧大人睇 SPY x FAMILY 同埋 Moving 異能   睇到 10 點半都瞓覺 lu ~