雪菜火鴨絲燜米 + 福花 ( 7-NOV-2023 )

尋晚食剩嘅煎堆同鹹水角

( 7-NOV-2023  TUE )

感恩一覺瞓天光   不過臨醒發咗好多夢呀   仲肯定記得係彩色   哈哈 ~

同阿花一齊喺一間好靚嘅麵包店買包   佢買咗個千層忌廉包   但佢放喺麵包盤時係好大力   將啲 Cream 黐哂落個盤度   完全唔似真實嘅佢   同埋我最記得佢個銀包同我係一模一樣 ~

我去完家姐屋企   之後就佢同姐夫嚟我屋企打邊爐   我執緊屋嘅時候   佢哋已經到咗   姐夫仲買咗一大袋生蠔比我   咁我繼續執屋   無啦啦就變咗里奧大人全部同事嚟我屋企打邊爐   佢哋買咗超級多牛肉同生蠔   將啲牛肉一層層放喺個爐度   起碼半尺高呀   擺到好似人哋擺牛雜咁   將所有嘢放喺爐邊慢慢滾 ~

其實尋晚好飽喎   但呢 3 個夢都係關於食嘅   不過咁都好   食嘢最開心   哈哈 ~

今朝叫里奧大人買餐蛋治   杯熱鴛鴦好熱呀   最鍾意咁 ~

里奧大人喺公司拎咗啲盆栽番屋企   佢啲同事係盆栽達人   之前有啲盆栽都係比佢地救番咋

我出門口先   咁見架 Lift 未到   我又驚自己無熄冷氣   所以即飛奔入屋   里奧大人一見到我就問係咪肚痛 ?!   慘啦   搞到佢咁緊張添 ~

天氣涼涼哋真係最舒服   但如果有埋陽光就更加好   哈哈 ~

菇場忙下停下   好快又到 Lunch Time ~

出去買完菜   之後去食柱候牛筋米   食完又再行陣先番菇場 ~

唔忙就做自己嘢   今日約咗公司保險 Agent 嚟簽保單   呢份保單係 For 公司團體優惠   所以家姐同同事都話抵   咁我就買啦 ~

Agent 5 點左右到   用咗 10 分鐘就搞掂份保單   依家電子化真係快好多   同埋之前提供哂所有資料比佢   基本上 Check 過無問題就可以即簽名呢 ~

放工即走   里奧大人話晏少少放工   咁我去街市買啲嘢先番屋企   咁聽晚就唔駛去喇 ~

番到屋企即預備晚餐   之後里奧大人都番埋嚟   叫佢沖涼先啦   因為燜米要啲時間   所以 7 點半先開得餐呀 ~

是日晚餐 - 雪菜火鴨絲燜米 + 福花

雪菜火鴨絲燜米 - 實在仲剩好多鴨肉   咁啱上次開櫃桶見到幾包雪菜   所以整個熄米   今日特登去買清雞湯同韭王   咁樣味道無咁單調呢 ~   

福花 - 買咗一大棵福花   $25 搞掂   好似話係 2 斤幾 ~

沖埋涼抖陣   食埋生果就熨衫 ~

睇多陣 Youtube   今晚 10 點半瞓覺 ~