臘腸潤腸拚臘肉 + 菜心苗 ( 30-NOV-2023 )

( 30-NOV-2023  THU )

尋晚半夜去咗次廁所   今朝又係鬧鐵響就醒咗   不過仍然都係等響咗先起身 ~

早餐又係食甜餐包夾芝士   奶茶都係 Share 飲 ~   

我同里奧大人講話今朝熱咗咁嘅   估唔到佢都話係   等我仲特登拎件長袖外套出嚟添 ~

食完就靈修 20 分鐘   依家多數搭 8 點幾班車   咁樣就有時間靈修 ~

菇場唔忙啦   同阿花 Whatsapp   佢話 Felix 今日嚟香港   我話完全唔知   佢話我已經退出咗韓國娛樂圈   我覺得呢句好好笑 ~

Lunch Time 同阿花船頭行去 AIRSIDE 嘅 Citysuper   不過佢哋食完嘢先行   但我唔餓呀   所以我自己行去先   行咗半個鐘先番菇場 ~

呢隻軟糖係我廿幾年前食過   當時只係 $10   我每次去 Citysuper 都會買   之後好似唔見咗一排   今次終於見到   但就唔會買住   因為想食哂屋企啲糖先買   如果味道同口感同以前一樣   就會買盒比家姐食

番到菇場都 12 點 40 分   所以食即食烏冬   但其實仲未餓   不過唔食又唔得   一陣餓就煩   哈哈 ~

船頭買咗盒 Mask   佢比 1 塊比我   我話唔要喇   我屋企有好多呀   但佢係都要比我   

菇場唔忙呀   繼續做自己嘢 ~

放工即走   番到屋企即預備晚餐   諗住只係蒸同淥係好快手啦   但差唔多 6 點 45 分先開餐 ~

是日懶餐 - 臘腸潤腸拚臘肉 + 菜心苗

臘腸潤腸拚臘肉 - 今次喺祥興買㗎   見好多人買我又買   臘潤腸比較淡   反而我鍾意   臘肉就入味同埋都好新鮮   因為口感係軟身   以前好驚食臘肉㗎   因為硬崩崩   其實可能放得耐得滯呀   哈哈 ~

菜心苗 - 依家 1 斤兩餐食都夠   同埋 2 斤又唔係平好多   最慘係有時唔煮又要留番   即係 2 斤菜可能放成個星期   我唔係咁想啦 ~

洗埋碗就開機洗衫   再做小清潔   搞掂就沖涼   里奧大人就去做運動 ~

抖陣就熨衫   之後睇下 Youtube 同打機   又打到 11 點先瞓 ~