新上海 @ 黃埔 ( 16-NOV-2023 )

小籠包+雲吞酸辣湯麵套餐 ($66) - 雖然個湯底唔熱   但個麵好熱   不過都唔能夠接受咁囉   加上個酸辣湯咁嘅色   我都無比里奧大人試喇   之後加醋就好食啲   但應該之後唔會再想喺呢間 Food Court 食嘢了

上海排骨炒拉麵 ($59) - 豬扒係新鮮炸起   但如果唔係炒拉麵就更好啦

握壽司拚盤 (特價 $42 原價 $59.9) - 我要食壽司呀   但好後悔買咗囉   啲飯係超級凍冰冰   食落真係有冰涼嘅感覺喎   第一次食咁凍嘅飯   好似放咗幾晚咁

( 16-NOV-2023  THU )

尋晚瞓到半夜熱哂   直頭係出汗   但繼續瞓   之後都要去次廁所   不過一揭開張被其實好凍   雖然話天氣涼咗   但夜晚都會開冷氣瞓呢 ~

唔知係咪食咖哩燥熱   所以又熱醒   因為上次食炸雞就係咁囉 ~

感恩起身條腰係無咁痛   同埋瞓覺嘅時候都唔痛   真係要里奧大人每晚幫我按摩先得 ~

我搽咗牛油同加片芝士   個麵包口感其實有啲似食拖鞋包   唔錯唔錯 ~

法式石烤農家麵包 ($39)   個包幾硬   所以要用刀切

菇場忙下停下   但放完假番工   要比啲時間習慣下   哈哈 ~

Lunch Time 出去一田買嘢   今日無咩人   可能尋日啲人已經買哂   一係就無嘢再買   因為年年都係嗰啲   同埋今年係貴咗好多囉   本身想買威化餅比里奧大人公司同事   上年個價錢係3件特價   依家係2件特價   咁我一定唔會買囉 ~

總統牌漢堡切片芝士 ($65/3 件) & 急凍和牛芝心漢堡扒 5 個 ($99.9)

樂天迷你濃厚朱古力批 ($33.5/2 件)

Johnsonville Sausage (Smoked Brats & Hot & Spicy) ($87.9/2 件)

買完就去買腸粉   之後番菇場 lu ~

仍然唔忙   可以抖下 ~

放工同里奧大人去 AEON   諗住去壽司郎   但要等 30 個號碼就唔等 lu   我寧願搵日星期六日早啲去好過 ~

里奧大人話點解成日要去壽司郎 ?!   我話家姐話好抵食   所以咪想試下囉 ~

咁行番去 AEON 搵食   上次喺 Food Court 見到間上海嘢好似唔錯   今晚一定要試 ~

我超級鍾意去 Food Court   因為以前番學嘅時候   每逢星期六都會同家姐去鰂魚涌 JUSCO 嘅 Food Court 食嘢   我估係因為係一個好開心嘅回憶   所以我先咁鍾意去 Food Court 食嘢呢 ~

食完就同里奧大人去買底衫   因為會員有 8 折    依家又要做番會員   哈哈 ~

不過佢都係買住 2 件先   好着先再買   我就買咗件長袖衛衣比家姐   里奧大人話紫色實無問題   初初睇到價錢係 $99 已經覺得平   但原來仲有8折   真係超級抵   同埋質地唔錯㗎   因為尋日同家姐睇衫  佢想買長袖衛衣   但唔係咁鍾意個圖案   咁今次好啦   我買淨色   唔會唔鍾意嘢啩 ~

買完都接近 8 點   係時候番屋企喇 ~

我同里奧大人講話呢個星期出咗 4 晚街   聽晚一定唔會出街   雖然每次出街都開心   但都想比自己抖下嘛 ~

沖埋涼就開機洗衫   之後同里奧大人睇 "Moving 異能" ~

睇完就打機   今晚打到 11 點半先瞓呀   次次都係咁   想買嘅時候又唔會獎勵時間   但唔玩呢   就會獎勵 3 個鐘   不過我都唔會玩囉   咁太耐對眼會好攰 ~