打邊爐 ( 26-NOV-2023 )

今次湯底都係用李錦記沙爹火鍋上湯

美國安格斯牛板腱 - 買半磅 ($48) 就夠   唔想食唔哂又擺落冰格

蝦滑 - 里奧大人鍾意食   咁一定會買比佢

差啲唔記得韓國廣島蠔嘅存在   雜丸就一粒都無食過   之得唔買啦   哈哈

水魷 / 牛柏葉 - 兩樣加埋 $76   次次都咁上下價錢   但今次食到每樣一半已經好脹胃   但又唔想留番   下次就咁買水魷算喇   因為一個人咁食好辛苦   哈哈

炸魚皮 - 今次斬脆   但個味道好似唔同咗

鳳城水餃 & 招牌鮮蝦雲吞 - 食剩 5 粒   實在食唔落喇   咁睇下聽日里奧大人食唔食先  

我諗緊呢塊係咩嘢嚟 ?!   之後望真啲原來係蝦滑   因為里奧大人就咁直接片落去   唔係整到圓型先放落去呀

( 27-NOV-2023  SUN )

今朝我鬧鐘響先   里奧大人話做乜佢鬧鐵唔響嘅 ?!   之後到佢鬧鐘響啦   但好奇怪大家都校 7 點㗎噃 ~

我不嬲都無校星期日鬧鐵   但里奧大人話校埋啦   一陣佢個鬧鐘無響就慘喇 ~

早餐都係食五香肉丁麵   雖然公仔麵   但爽爽哋好食呀 ~

食完就去里奧大人公司幫手   今朝仍然拍住勁哥   其實只係一齊吹水   所以時間過得好快 ~

見到皇太后   我即刻開盒花街呀   仲特登揀哂佢鍾意食嗰兩款比哂佢   佢好開心同好驚訝   話估唔到我會記得佢講過嘅嘢   哈哈 ~

上次我講開鍾意買細嘅洋蔥   佢即刻話下星期買比我   我話唔可以呀   再話妳買咗比我   我都唔會要㗎下   佢成日都係咁㗎   一問佢點樣係靚係好 ?!   佢就會去買   所以我同里奧大人都唔會講話鍾意食啲咩  唔係又 "炸炸弟弟" 買比我哋呢 ~

咁比哂金色比佢   佢叫我唔好食咁多甜嘢   我話再比其他妳又唔要   要幫我食嘛   不過佢係都唔要   哈哈   之後我問勁哥同阿妹   佢哋又唔要   咁我唯有拎番公司慢慢食啦 ~

今日事奉完就去里奧大人公司拎架戰車去買餸   阿妹話唔驚人見到咩 ?!   我話驚咩鬼呀   去買餸咋喎   同埋買咗唔通唔用咩 ?!

呢架淘寶買   盛惠人仔 111

放哂所有嘢落車真係好方便   依家真係拎唔到咁多嘢喇   雖然每袋唔係重   但加加埋埋就好重咁囉   如果買埋生果就更重   疫情嘅時候   我每次去街市都買1x 磅嘢   因為唔敢日日去   過咗幾年時間   體力真係大不如前   加上之前網球手痛到我死死下   真係唔敢一次買咁多   但依家有戰車就可以喇   哈哈

里奧大人話起碼 2 點先放工   我話無問題啦   我都要 2 點先番到屋企 ~

番到屋企即開機洗衫   之後就沖涼再預備午餐 ~

里奧大人 2 點幾番到屋企   佢問有得食未 ?!   我話整好哂啦   所以佢食完先沖涼 ~

尋日食剩嘅午餐   今日直接放入焗爐焗熱就搞掂   今日食先知啲辣椒原來好辣呀

再整熱綠豆沙   我覺得熱好食過凍   

我叫里奧大人幫我洗架戰車碌呀   因為我買嘅時候講過   佢幫我洗碌先買嚟用   哈哈 ~

里奧大人 3 點幾瞓晏覺   我就睇 Youtube   不過 4 點 15 分左右瞓着咗   瞓咗 20 分鐘都醒喇   之後就好精神   感恩感恩 ~

今晚打邊爐   所以唔駛點樣預備   只係煲咗白蘿蔔水   咁樣湯底應該可能會甜啲   哈哈 ~

6 點 20 分都可以開餐   算係好快㗎喇 ~

洗埋碗就即沖涼   今晚又可以同里奧大人一齊睇 "思家大戰"   開心開心 ~

睇完就再一齊網上敬拜   之後又睇 SPY X FAMILY ~

咁再打下機   又同里奧大人傾下偈   奇怪點解越傾越眼瞓咁   原來已經 11 點 10 分喇 ~