韓式辣汁焗金沙骨 + 蔥蓉炒飯 ( 17-NOV-2023 )

好在剩番咁多薯仔   因為今日無時間買菜呀

今晚落鑊煎   估唔到脆卜卜仲正   真係激死我   次次第 2 次先整得好味道   希望下次再買嘅話   記得落鑊煎啦   哈哈

( 17-NOV-2023  FRI )

感恩又一覺瞓天光呀   鬧鐘響前 1 分鐘就醒咗   咁都預備整早餐了 ~

仍然係食法式石烤農家麵包   呢個包係需要啲時間慢慢咬   所以里奧大人叫我下次唔好再買呢個包   哈哈 ~

菇場忙咗陣就可以做自己嘢   之後家姐打嚟話姐夫出去整嘢   所以過嚟陪我食 Lunch   聽到就好想快啲到 Lunch Time   哈哈 ~

我話不如食韓燒   家姐話會唔會太飽 ?!   我話 Sorry 囉   只係食 Lunch Set ~

Lunch Time 一到就即飛去餐廳   家姐 11 點 47 分先到 ~

佢話頭先真係要搵點嚟 Mikiki 呀   嗰個人答佢應該鑽石山行去 Mikiki 仲快   我話妳識行都可能係嘅   但我啲同事都係喺啟德搭地鐵喎   同埋其實如果唔識去 Mikiki   我哋都可以喺 AIRSIDE 食嘢呢 ~

坐我隔離係 Yoda   哈哈哈哈

牛五花 ($86/300g) - 無諗過份量都唔少   初初諗住額外加半份牛大腸同牛小腸   不過未番貨   所以要 300g   其實 $69/200g 都應該夠   哈哈

韓式菜包黑毛豬五花 ($85/300g) - 家姐唔想兩個餐都係飯   所以叫呢個喇 

我覺得張枱好細

有 6 款醬汁   家姐話唔夠碟裝哂 6 款   我話每格 1 款咪得囉   反正都係一齊蘸嚟食   又唔係外人怕咩   哈哈

因為啲肉都幾薄   所以要好小心咁燒   唔係會好易燶

包住食係好味道   但好怕生菜啲水   會流到成隻手都係

食下傾下   再睇錶已經 12 點 50 分   咁啱家姐差唔多有車   所以都走喇 ~

襯家姐用消毒紙巾抹手   我就不經意咁擺張單喺我隔離   唔係佢又爭住比   同埋張枱又係爐   一陣爭爭下   張單陣跌落個爐就慘了 ~

家姐話一陣番屋企要洗頭沖涼   我話唔好講啦   我一陣仲要番工   之後我聞件衫無油煙味   我叫佢聞下   佢話好香   哈哈哈哈   之後問我洗衣珠咩牌子   其實我聞慣咗就唔覺   因為家姐去我屋企廁所   佢成日話好香   可能我有香薰蠟燭   不過我無點㗎   當擺設咁呢 ~

感恩 10 分鐘後有巴士   送埋佢上車就番菇場喇   遲咗 7 分鐘   好在同埋船頭阿花一齊搭 lift   呵呵 ~

菇場唔忙   感恩無飯氣攻心呀   我真係番工嘅時候好少食飯   我估都有 4 年   因為我怕飯氣玫心會瞓覺   同埋食飯又真係飽得滯嘛   始終我早食   就算以前 12 點半都覺得早   何況依家 ~

行去 Pantry 斟水   小 A 喺我面前 "吓" 咗一聲   我問咩事 ?!   佢話妳成日話凍   今日咁凍仲着裙   我話未想着冬天衫住   哈哈 ~

放工即走   番到屋企都要預備晚餐   最搞笑里奧大人 5 點幾話放工   但又係 6 點幾先番到屋企   尋晚又係咁   搞到我以為自己聽錯 ~

是日晚餐 - 韓式辣汁焗金沙骨 + 蔥蓉炒飯

韓式辣汁焗金沙骨 - 特登醃多啲諗住里奧大人帶飯   但尋晚出咗街就無食   今晚食就覺得多啦   所以食剩幾件都要留番囉 ~

蔥蓉炒飯 - 之前食海南雞剩咗啲蔥蓉   咁用嚟炒飯最好喇 ~    

洗完碗就大清潔廚房再開機洗衫   之後沖涼喇 ~

估唔到兩晚已經熟哂   家姐嗰包又係咁

同里奧大人睇 "Moving 異能"   睇到 15 集又開始好睇   不過我 10 點 45 分都要瞓覺 lu ~