辣肉醬撈麵 + 粟米蛋花湯 ( 15-DEC-2023 )

里奧大人中午食剩半盒馬拉盞海鮮炒飯   我話其實廚師係咪無落馬拉盞呀 ?!   因為完全食唔到馬拉盞味道   怪不我里奧大人話無味啦   原來係真嘅   哈哈   

( 15-DEC-2023  FRI )

感恩一覺瞓天光   臨醒前個夢係我同唔知邊個講   話有個夢每次嘅場景同人物係一樣   講完之後就鬧鐘響 lu   但感覺我其實仲未講完   哈哈哈哈 ~

早餐食窩夫   今次只係搽少少牛油   因為我驚齋食會好乾   估唔到里奧大人食得出我搽咗啲嘢喎   佢話咁樣好食   食落無咁乾   好在我真係搽咗牛油啫 ~

菇場忙下停下   所以時間過得好快 ~

肥到成隻豬仔咁   但其實企身就唔肥囉

Lunch Time 出去行陣   之後買豬軟骨酸辣米線番菇場食 ~

比錯咗麻辣湯底   因為食嘅時候   有麻麻哋嘅感覺   之後再睇又唔見有酸菜   但就有榨菜絲同花生   咁就好肯定唔係酸辣啦   因為食咁多次酸辣都唔會有呢啲配菜

3 點開始勁忙   真係 5 點 26 分先搞掂 ~

放工即走啦   行到一半路摸下個袋   發現無帶銀包   要番去菇場拎番啦   其實好感恩   因為都唔知點解無啦啦會摸個袋   平時多數係上車前先拎定銀包咁咋 ~

好喇   趕到班車喇   仲有 1 分鐘架巴士就到   但突然搞肚痛   又要飛去商場   感恩之後都好快有車 ~

其實頭先喺菇場度都無啦啦搞肚痛   唔知係食咗中藥定麻辣米線先咁呢 ?!   因為上次食完麻辣之後唔舒服   我依家唔會亂咁食麻辣   但佢比錯就無辦法囉   唉 ~

里奧大人話今晚出去食   但我驚食食下又搞肚痛   所以都係煮飯 ~

番到屋企都即刻預備   要接近 7 點先開餐 ~

是日懶餐 - 辣肉醬撈麵 + 粟米蛋花湯

辣肉醬撈麵 - 個辣肉醬係罐頭   估唔到又幾好味喎   因為食辣肉醬   所以就配撈麵喇 ~

粟米蛋花湯 - 依家罐頭粟米湯真係越嚟越小粟米粒   我加埋水之後   感覺係一個芡汁咁   好在加咗 2 隻蛋咋 ~

洗埋碗就小清潔屋企   洗埋衫就沖涼   里奧大人就去做運動 ~

我買咗燒餅   里奧大人話尋晚已經想買比我食   但佢記得我話之前食到驚   所以唔敢買   哈哈

睇陣 Youtube   今晚 10 點 45 分瞓覺 lu ~