打邊爐 ( 22-DEC-2023 )

雖然今餐係冬至晚餐   但少少哋食物就算喇   哈哈

白蘿蔔都甜呀

只係得美國特選級牛梅花肉   因為我唔知有無得放早   所以都係今晚有咩買咩咁呢

估唔到無起價   因為今晚肯定好多人打邊爐   我見好多菜都起哂價呀

鳳城水餃 / 招牌雲吞各半打

放埋一隻碟其實都幾迫   哈哈   不過我唔想洗多一隻碟

每樣只食咗 2 粒   如果可以買每樣各 3 粒就好啦

買咗半磅麻辣湯包   不過今晚食 3 粒先   因為都幾大粒下   同埋想清哂其他丸先呀

鮮炸魚皮   打邊爐食炸魚皮真係好正

因為唔想煮湯丸   所以買紅豆砵仔糕代替   本來我想喺屋企附近買紅豆燒餅   好在真係買咗砵仔糕咋   因為燒餅比人買哂喇

( 22-DEC-2023  FRI )

感恩一覺瞓天光呀   7 點 18 分都起身整早餐 lu ~

里奧大人好搞笑   又係起身就問尋晚夠唔夠暖 ?!   我話熱呀   佢話真㗎 ?!   我話假嘅   之後我就話佢又要問人又唔信人   佢話講真話唔得嘅   哈哈哈哈 ~

不過家姐同 8 卦都係咁   我成日答完佢哋   佢哋都會問係咪真㗎 ?!   所以我都要好好檢討一下自己   哈哈 ~

早餐食衛星包夾芝士   今朝一定要食埋去喇 ~

今朝要帶埋冷帽   真係好日唔自拍   咁難得帶冷帽同頸巾   所以想 Send 比里奧大人睇下   我 Send 完之後感覺隔離個人行到好埋咁   原來係叻叻   佢可能睇埋我個自拍過程呀   極度樣衰   哈哈 ~

市區氣溫得 8 度   咁先係冬天溫度嘛

菇場唔忙   今次居然 9 點 10 分就喺群組通知放 4 點   平時好晏先通知㗎 ~

里奧大人放 3 點   家姐就放 3 點半   不過里奧大人就可以 1 點放工   因為補假 ~

今朝 Send 咗冬至 Icon 比阿仔   之後同佢由 9 點半傾到 11 點 45 分呀   真係眼都濛埋 ~

咁諗住即刻出去食飯啦   但見阿齋用暖包搓手真係奇境   所以問佢係咪唔舒服 ?!   因為平時我同佢係最怕熱   夏天一番埋位係第一時間開風扇仔㗎嘛  ~

傾完就去行陣   之後食牛筋河   食完又行半個鐘先番菇場 ~

個個等放工呀   所以靜到不得了   哈哈 ~

4 點即走   買埋邊爐料就番屋企   最搞笑里奧大人打嚟問咁耐仲未番到屋企嘅 ?!   佢以為我喺屋企附近買呀   我話要行另一邊買㗎 ~

番到屋企都慢慢預備   今晚 6 點唔夠就可以開餐喇 ~

(東遠) 部隊火鍋 ($42/2 件)   好似幾咁抵   所以買嚟試下

洗埋碗就抖陣   之後同里奧大人一齊做運動   今晚我做 20 分鐘   因為頭先行咗好多路有啲攰呀 ~

沖埋涼就開機洗衫   搞掂哂就同里奧大人一齊睇 "新聞女王" 大結局   估唔到會有信息帶出嚟 ~

睇多陣 Youtube   今晚 10 點 50 分都瞓先 lu ~