加咗啲花生 當堂有口感 哈哈
( 23-DEC-2023 SAT )
感恩一覺瞓天光呀 6 點 59 分都醒咗 真係時間啱啱好 因為我校咗 7 點起身 感覺無鬧鐘響係自然醒嘛 哈哈 ~
即刻沖涼洗頭 搞掂就出發去家姐屋企喇 ~
今朝同家姐 姐夫飲茶 家姐 Whatsapp 問我識唔識行去 ?! 我話第一次去咩 ?! 但最後行錯路呀 要打比家姐問點樣行囉 真係勁樣衰 哈哈 ~
其實我食早餐最主要係飲啖咖啡 家姐話尋日試咗杯即磨咖啡都好飲 所以今朝就陪我飲喇 ~
呢杯即磨咖啡真係好飲過凍咖啡 家姐果然無介紹錯
第一碟上枱就係蜂巢芋角 因為係新鮮炸起 我話太熱氣喇 要遲少少先食 哈哈
蔥花蝦米炸兩腸粉 - 家姐好憎食蔥㗎 佢係會走蔥 但因為我食就唔走蔥啦 估唔到今次得咁少蔥 之後我話整定 姐夫話係新鮮整㗎 唔會整定㗎 我同家姐喺度笑 我話整定係註定呀 唔係整好咁解呀 哈哈哈哈
鮮蝦菜苗餃 - 呢個都好味道
鳳爪排骨飯 - 姐夫食㗎 細細碗就最好
醬皇蒸鳳爪 - 我話唔食都得㗎 家姐就話姐夫都會食啦 所以係都要叫嚟食 知道平時無機會食 哈哈
山竹牛肉球 - 如果有干蒸牛肉就仲好
合時糯米飯 - 無食過呀 所以我話比我今晚食
咁等比錢嘅時候 我行咗去睇嘢 之後再搵番家姐 收銀員話我同家姐完全唔似樣 之後仲係咁望住我再望家姐 再話同人講係兩姊妹都無人信 呢句搞笑呀 ~
同家姐去藥房買嘢 之後都番屋企 lu ~
今朝 8.1 度 我都要出動冷帽呀
一影相就扮嘢
難得飛機耳
坐得好豪邁
知道我影佢 哈哈
鬼祟眼
啡色眼睛
好肥呀
眼圓圓咁好得意
咁嘅表情好得意呀 好似啲老人家望人咁
我同家姐講緊 Berry 唔知咩 佢突然咁望我呀 好似知我哋講佢咁
同家姐傾偈 工人就一路食早餐一路傾埋一份 我仲以為佢放假呀 真係仲嘆過我咁噃 ~
不過個個都好鬼凍 都唔係咁願郁 屋企又開埋暖風機 我話一陣出去就更加凍 哈哈 ~
一坐得無嘢做 家姐就會拎呢樣拎嗰樣出嚟搞 無啦啦又話要我量血氧含量 又想叫我驗埋糖尿 我話吉手指好痛呀 我唔驗囉 ~
血氧飽和度都唔錯 但心跳快咗啲 所以成日要用力泵囉
我買 5 Kgs 珍珠米 因為我係將啲米放落雪櫃 要分開 4 個盒 咁樣已經佔咗一格位置 個雪櫃無哂位咁滯 所以我依家又會叫家姐比包米比我 一個 Ikea 密實袋裝 4/5 就啱啱好喇
呢包米粉係 2018 年到期 所以我同家姐肯定係親生姊妹 哈哈哈哈
我唔會比佢瞓㗎 除非佢痴住我嚟瞓啦 哈哈
家姐喺屋企食埋 Lunch 先同我去搭車 所以就唔陪工人同 Berry 落街喇 ~
Berry 好快番上嚟呀 家姐話佢平時唔會咁㗎 話 Berry 女想見多我一面喎 我話唔駛氹我喇 哈哈 ~
咁咪乖囉 坐定定比我影相
同家姐搭地鐵 咁我得好慢 因為個袋有袋米同椰青水 所以好重呢 佢成日想幫我拎 之後仲係咁話我唔得㗎喇 真係啋過妳囉 ~
我都唔番屋企放低嘢先喇 所以直接約里奧大人喺十二味等 咁啱里奧大人都話天氣凍想食啲辣嘢 ~
之後我話搵晚整部隊鍋 里奧大人話不如今晚整啦 我話唔好啦 但唔記得再講句咩 佢話都係味精嘢 駛咩要特登搵日整呀 哈哈 咁佢又講得無錯嘅 ~
終於係花生小食喇
川式口水雞 (少辣) - 我都係鍾意食口水雞 水準多數穩定 哈哈
酸菜魚 (少辣少油) - 呢個都好食 酸酸咪咪夠開胃
食完行陣就番屋企喇 抖陣就開機洗衫 之後休息 lu 里奧大人就瞓晏覺 ~
糟糟喺錦祥號買臘潤腸 所以家姐又買埋我嗰份喇
我想食太陽餅好耐 不過就唔敢買 因為得我一個食 估唔到家姐屋企有 所以佢話同我 Share
4 個椰皇
啱啱好放哂一個保鮮盒
阿妹 5 點幾 Whatsapp 我 問里奧大人起身未 ?! 我話未起身喎 咁再問佢係咪有急嘢搵里奧大人呀 ?! 佢話少少急急哋啦 之後又話里奧大人瞓咗咁耐係時侯起身喇喎 哈哈 其實我都已經叫咗里奧大人起身啦 肯定有大鑊嘢先咁急搵里奧大人處理嘛 ~
6 點鬆啲就預備晚餐 所以 7 點唔夠就開餐喇 ~
8 隻水餃雲吞都差唔多佔哂成個玫瑰鍋 所以真係覺得佢咃啲份量好巨
是日懶餐 - 水餃拚雲吞 + 糯米飯 + 牛肉海帶湯
水餃拚雲吞 - 尋晚食剩又無放冰格 所以今晚要食埋去喇 ~
糯米飯 - 口感好腍呀 但味道都 OK ~
牛肉海帶湯 - 喺韓印紅買嘅湯包 原來都差唔多到期 咁都要飲喇 好似仲有 2 包添 ~
洗埋碗就同里奧大人做運動 今晚可以做 25 分鐘 哈哈 ~
沖完涼就睇 Youtube 睇到差唔多 11 點先瞓 ~
沒有留言:
發佈留言