合群記 @ 紅磡 ( 9-DEC-2023 )

秘製咖哩坑腩飯 ($46) - 都幾辣   同埋最緊要啲飯唔係腍 Pat Pat

魚皮餃+魚肉春卷+豬肉丸粗麵 ($40) - 啲餸都 OK 啦   但麵嘅份量都好多下   我下次會試牛什麵   我都係鍾意濃湯底   哈哈

( 9-DEC-2023  SAT ) 

感恩一覺瞓天光呀   鬧鐘未響都醒咗   就早啲起身沖涼洗頭喇 ~

今朝諗住叫里奧大人買早餐番屋企食   不過里奧大人話不如出去食啦   咁都好喎 ~

食完就去佢公司坐陣   之後就番工喇 ~

菇場忙呀   之後家姐打嚟傾咗半個鐘   佢都話無諗過我會忙   哈哈哈哈 ~

之後里奧大人又話皇太后有嘢比我   佢見到洋蔥話唔要呀   實在太多嘛   但皇太后話肯定妳老婆鍾意   之後我同里奧大人講囉   上次同皇太后講話鍾意食細洋蔥嘛   里奧大人話唔怪得之皇太后咁講啦

 

差唔多 12 點幾先搞掂   但放工都即走   因為 Join 埋家姐一齊去旺角 ~

好在上到車咋   雖然好多車出旺角   但係班次比較疏   同埋多數係全部車嚟哂   咁同樣即係一次過全部車走哂   要等好耐啦   哈哈 ~

因為里奧大人未到   所以同家姐去睇番細個住嘅大廈   爸爸徒勞開嘅茶餐廳   不過轉咗手 lu   仲諗住入去傾下偈添 ~

諗住去接里奧大人   估唔到佢都啱啱喺雅蘭中心落車   咁過埋去先一齊搵食 ~

我同家姐講話旺角好多食店   唔怕無嘢食   只係好唔好食   最搞笑佢真係以為我食過好多間食店咁   之後我見到沙爹王   話不如去食啦   坐得都舒服嘛   同埋我唔想搵   哈哈 ~

二人套餐 ($268)

食極唔停芝士條 (+$6) - 我同家姐都鍾意食芝士   所以叫呢個喇   熱辣辣好鬼正

脆卜卜炸薯條 (+$6) - 外脆內嫩仲要新鮮炸起   呢個真係有驚喜呢   但佢係最後先上   所以食到好飽再食薯條   就要慢慢咁食了   哈哈

主食 x 2

沙爹牛扁胛烏冬 - 沙爹湯底真係回憶番哂啦   因為後生嘅時候成日去沙爹王食嘢㗎

白咖哩豬扒飯 - 豬扒好味呀   個汁都唔錯

小食 x 1

避風塘軟殼蟹 (+$25) - 一擺上枱都覺得熱氣   我都要灘下先敢食呀   避風塘料惹味又夠辣   依家睇相都想再食   哈哈 

飲品 x 2

極上啤酒 (+$10) - 里奧大人本身就咁食芝士條就無問題   但再食薯條就真係要飲啤酒清熱喇 

鮮芒椰汁沙冰配寒天波波 - 呢杯又 OK 喎   我覺得好味過金坊添呀

甜品 x 2

Haagen Dazs (75 ml) 曲奇雲厘拿 & 士多啤梨 - 我哋手機落單   諗住叫飲品係最後   估唔到仲有雪糕

食到 3 點半就走人喇   家姐去整嘢   我哋就去配眼鏡 ~

經過聯合廣場   叫里奧大人睇下衫啦   佢買咗 3 件衫   真係無諗過買反而買到 ~

之後我叫佢送衫比我   咁我出手指   佢叫停就等如我買嘅數量   我出咗 8   佢話出1隻手指唔得嘅 ?!   下下最細都出到 8   咁都比佢識穿添   哈哈 ~

拎完眼鏡都接近 5 點   去完花園街買木瓜就走喇   我話唔睇衫住   因為我唔想番崇拜遲到 ~

崇拜完畢諗住走   不過里奧大人公司有好多突發事件要處理   咁我都一齊番去啦 ~

搞掂哂都 8 點   所以都去食晚餐喇 ~

食完去萬寧買 Hand Cream   因為今日有 9 折   不過無咁多貨   所以比咗錢之後一次過拎 ~

番到屋企即開機洗衫   搞掂就沖涼喇 ~

我買咗 24 支細 Hand Cream 折咗 $216   之後我見佢拎兩排綠茶出嚟   拎完佢再拎埋盒朱古力出嚟話係送嘅   我問做咩送嘅 ?!   佢話買護膚品滿 $160 就送   仲有 3 張 $5 現金劵   佢幫我即時扣埋   我真係覺得抵上加抵呀   感恩感恩   好在叫埋里奧大人一齊去買咋   唔係拎兩排飲品都幾重呢 

估唔到皇太后買咗咁多嘢比我   收到嚿薑真係好感動   因為我話淥菜唔落薑同埋唔識揀呀   零食就係佢鍾意食嘅   所以買比我試   原來係米通   我鍾意食呀   之後我同里奧大人講囉   話好食佢又會買   話唔好食又令佢傷心   真係左右做人難呀   哈哈

睇陣 Youtube   諗住 10 點半瞓   但居然一啲都唔眼瞓   可能頭先飲咗包綠茶 ~

咁靈修啦   所以今晚差唔多 11 點 45 分先瞓 ~