沙茶醬炒免治豬肉 + 菜心苗 ( 20-DEC-2023 )

再隔多一晚食   鵝掌更加入味

( 20-DEC-2023  WED )

感恩一覺瞓天光   7 點 18 分已經醒咗   但灘多 3 分鐘就起身喇 ~

早餐食牛油排包同牛油卷   不過里奧大人番晏   所以我自己食先 lu ~

靈修半個鐘就出門口番工   時間啱啱好 ~

菇場 3D   感恩終於補眠成功   唔夠瞓真係連眼睛都濛查查咁   但今日就無濛喇   感恩感恩 ~

阿後同阿齋講一大輪嘢   不過我無細心聽   只聽到阿齋同阿後講: 得啦   妳越講越亂   之後阿後又同會計講一大輪嘢   最後聽到話比 $10 就可以延期用埋所有表格   講完再同阿齋講   但我覺得最離奇係唔講話比 $10 就搞掂呢 ?!   之後阿齋話一早講話比 $10 咪得囉   仲話叫司機去拎新嘅表格   停車場同油費都唔止十蚊啦 ~

Lunch Time 出去行陣   食埋墨魚丸河就再周圍行   行到 12 點 40 分就番菇場喇 ~

忙下停下   好快放工 ~

番到屋企即預備   諗住煮完就拎比里奧大人   但佢話如果煮好就可以番嚟食   咁啱我啱啱煮完   佢可以番嚟食喇 ~

是日晚餐 - 沙茶醬炒免治豬肉 + 菜心苗

沙茶醬炒免治豬肉 - 依家多數買西班牙 Batalle 黑豚免治豬肉   真係除咗煲湯先買新鮮豬肉   始終我都係鍾意買急凍嘢   隨時解凍就食得嘛 ~

菜心苗 - 終於清哂   因為我今晚食新彊辣炒米粉   真係好鬼辣   所以突然覺得菜心苗好甜   哈哈 ~

洗埋碗再小清潔廚房   之後即刻去做運動喇   今晚可以做 25 分鐘呢 ~

正想走嘅時候就見到里奧大人   咁我都唔陪佢喇   趕住睇電視呀   哈哈 ~

開埋機洗衫就沖涼   之後睇 "新聞女王" ~

奇華換嘅芝麻糯米糍

超級勁難食   我記得好耐之前買係好食㗎喎

家姐之前喺澳門買嘅脆豬肉紙   都買咗接近 3 星期   所以要開嚟食咋   好在仍舊脆卜卜呢

睇多陣 Youtube   今晚 10 點 40 分都瞓先   呢排凍凍哋   坐坐下其實都好眼瞓   哈哈 ~