叉燒炒米粉 + 蕃茄薯仔大眼雞魚湯

唔讚自己唔得...尋日真係好攰又唔多舒服咁...但又唔想里奧大人成日食街嘢...所以點辛苦都唔比自己籍口唔煮飯...覺得自己好似好偉大咁樣呀... 
所以...尋晚用沉重嘅腳步去街市買嘢...首先買芹蒜 ($3)...之後就諗滾唔滾湯好...因為里奧大人好耐無湯水...但自己又要煲中藥...好煩...最慘係用哂兩邊爐...中藥果邊唔郁得...但煲得湯黎又要趕頭趕命炒米粉...好辛苦...最攪笑係去咗街尾果幾檔睇 d 蕃茄都好唔靚 (個心係度笑...唔通個天都唔想我咁辛苦??)...所以我已經放棄滾湯...但...番屋企係途經街頭嘅...點知見到 d 蕃茄好大好靚...咁...點可能唔買喎...買咗兩個蕃茄 + 一個薯仔 ($10)...買完又要去番街尾買條大眼雞魚 ($14)...好在行番街尾...因為原來唔記得買叉燒...買咗一條自己揀完去磅嘅叉燒...我揀最細條果 d...都要 $20...其實我想買 $10...但唔敢叫佢斬一半...好驚比人鬧買咁小呀...所以先買 $20 咋...我就真係唔係咁鍾意食叉燒...但里奧大人就勁鐘意食...咪比佢食多 d 囉...
是日晚餐 - 叉燒炒米粉 + 蕃茄薯仔魚湯 
叉燒炒米粉 - 好似好簡單...原來都幾麻煩 (我覺得)...米粉要浸...叉燒要切絲...芹蒜要切粒...分開幾十隻碟黎裝...唉...都唔明點解...我用開水浸廣東米粉...浸成半個鐘都浸唔軟...大佬...要開鑊喇...幾時先得黎軟呀...把幾火用熱水浸...浸咗十分鐘都仲唔軟...唔鬼理就拎去炒...一餅餅死唔分開咁...我左手用鑊鏟...右手用筷子係咁 "了" 散去...炒完對手攰到丫...但食嘅時候都有 d硬...激到我跳舞呀...浸咁耐炒咁耐都仲係硬...想點呀

蕃茄薯仔魚湯 - 我其實好怕滾湯...因為我係用兩至三碗水黎滾嘅...所以 d 水會好快滾...要喺等水滾期間要攪掂哂所有材料係好趕...因為一睇見水滾個蓋係度伏下伏下咁...就會好緊張...好似催我要放哂 d 材料咁...所以滾湯嘅壓力真係好大...所以依家唔會切蕃茄皮...就咁擦表面就算...薯仔求其切...總之煲完可以食得就算架喇

可能太耐無一次過煮嘢又煲中藥...煮完洗埋碗個人有 d 虛脫

一飲中藥就諗起之前要食 d 藥丸仔...所以就即刻拎哂 d 樽仔出黎...計下自己食咗幾耐藥...一日食 4 次...原來都食咗唔小日子...希望身體快 d 調理好啦

藥丸係細細樽同細細粒嘅

         

今朝食雪菜肉絲米粉 + 熱咖啡 ($17)....碗雪菜得幾條肉仔又幾好噃...因為我唔食肉絲嘅...食完 d 感覺好唔舒服

晏晝又係帶飯...撞鬼...d 米粉好似鐵線咁...係咪咁呀...食餐飯仔都咁辛苦