黑椒豬扒湯麵 + 隔夜湯 + 跑步機 ( 14-MAY-2008 )

尋日喺公司連出幾篇 Blog...放工走嘅時候條腰痛到不得了...掛住打嘢都唔記得自己嘅坐姿正唔正確添...

食完個麥記之後個肚搞搞下...都應該係啲薯條太油膩喇...

一早醃好咗豬扒...所以唔駛趕去街市買餸... 

番到屋企即換衫做機....做完就要即番屋企煮飯...咩都要即刻...如果唔係唔掂...

 
是日懶餐 : 黑椒豬扒湯麵 + 隔夜湯

黑椒豬扒湯麵 - 就咁煎...無任何醬汁點...但都好好食...

隔夜湯 - 有大量粟米...唔駛特登再煮菜...

洗完碗沖埋涼真係好想熨衫...但亦都真係太攰...所以最終都係無熨...

 
今朝去食炒米粉 + 奶茶 ($13)...好在碟米粉唔鹹...但就一樣咁多油囉...

 
晏晝同里奧大人食車仔麵 ...食咗六十蚊...我覺得好貴呀...但又幾好味同埋份量都唔少...