勝瓜炒雞腎 + 辣汁龍脷柳 + 跑步機 ( 21-MAY-2008 )

諗餸煮飯真係好煩...因為我識煮嘅嘢實在太少喇..

同埋又唔可以淨係煮自己鍾意食嘅嘢...所以真係諗爆頭都未必諗到煮咩...

好在平時喺菇場 Print Out 唔少食譜做 Reference...如果唔係就唔知點好喇...

 
最怕落雨濕濕去街市買餸...所以拿拿聲買 2 隻雞腎 ($6) 同 1 條勝瓜 ($2.5) 就番屋企...

 
番到屋企第一時間換衫去做機 lu...其實星期一真係好攰...同埋無咩心機做機...但我唔可以比呢啲籍口自己嘅...橫掂里奧大人 9 點先番到屋企...咁仲更加無理由唔做機啦...

 
是日晚餐 : 勝瓜炒雞腎 + 辣汁龍脷柳

勝瓜炒雞腎 - 第一次整雞腎...但整完呢餐雞腎...我諗唔會再整...因為個腎好恐怖...仲要生勾勾咁切落去...好核突...又驚有血腥味...所以炒時落啲雞粉...加勝瓜之後又再落假雞湯 (雞粉 + 水) 兜勻再焗幾分鐘...兜勻再焗幾分鐘...因為好驚啲雞腎唔熟...食落唔錯...但唔知點解啲雞腎好鬼韌...咬好耐先可以吞...同埋一路食一路諗起切嘅過程...所以趙兩趙就即吞...如果唔係就會食唔落㗎喇...幾驚夜晚會胃痛呀...

辣汁龍脷柳 - 今次用泰式辣醬...期望以辣味遮蓋腥味...

睇無線套 "法証先鋒 2"...林文龍做戲真係好唔掂...好唔入戲...我都係一個超級易喊嘅人嚟...但睇見佢喊...我一啲想喊嘅感覺都無...反而覺得睇見佢就煩...點解我會咁㗎... 

今朝想食糯米雞...點知無呀!!所以退而求其次食丁蛋麵 + 熱央 ($19)...又加咗價喇...上星期明明 $18 咋...

番到菇場啲同事好似幾忙咁...所以大聲啲按 Keyboard 都無問題...唔駛就住就住...

 
問里奧大人晏晝想食咩...里奧大人話食車仔麵囉...諗唔到食咩喎...咁我問怕唔怕熱先...話唔怕喎...咪去食囉...因為要行 15 分鐘先到...去度即叫一個 8 餸配菊花茶同一個 5 餸餐配酸梅湯 ($41)...突然好想食青椒...所以叫咗單寶 ($5/4 件)...不過今次無咩冷氣同埋對住條窄巷...所以里奧大人食到一半就話下次唔好食...因為實在太熱喎...而我呢...咪一路食一路流汗囉...諗到食完又要熱辣辣咁行番 15 分鐘先到公司真係有啲想喊呀...行行下...里奧大人突然話: 唔知係咪同妳一齊食嘢開心呢 ?!...因為自己一個人係食唔哂一個餐㗎喎...