磨豉醬肉粒炒飯 + 牛油粟米 + 節瓜紅衫魚湯 ( OCT-2008 )

尋晚又煮飯 lu   不過都係超簡單嘅餸菜   因為出街食又無益又嘥錢呢 ~

去到街市見人撻生魚   嚇到我想暈想嘔呀   我最怕經過魚檔同雞檔   因為好腥同好臭   同埋見到佢哋生勾勾   之後就要比人劏   好可憐咁呢   所以我絕對係唔會買新鮮嘢煮㗎   因為未煮我已經暈咗喇 ~

我唔識得有咩湯可以滾   所以又係滾番節瓜紅衫魚湯   因為平啲   節瓜 2 條 ($5) + 紅衫魚 2條 ($15)  再買粟米 3 條 ($8)   本來想買龍眼   但無咩益   所以唔買   拿拿聲番屋企 lu ~

是日晚餐 - 磨豉醬肉粒炒飯 + 牛油粟米 + 節瓜紅衫魚湯

磨豉醬肉粒炒飯 - 肉粒係之前醃剩嘅排骨    因為得番幾舊   所以切粒  加磨豉醬一齊炒  再連飯一齊炒    味道唔錯 ~

牛油粟米 - 好想食    所以又煮粟米喇 ~

節瓜紅衫魚湯 - 我覺得大眼雞無咁腥    但去到街市得好大條嗰啲起碼要 50 蚊   太貴喇   所以平平哋用紅衫魚算 lu   最緊要係有啖湯水飲下嘛 ~

我都係鍾意自己煮嘅簡單而幾好味嘅晚餐   因為可以一路食一路睇電視   又可以舒舒服服咁食 ~

呢排要食多啲木瓜增加免疫力   但都要食下其他生果嘅   一星期前買咗個西瓜仔   $12 咋   但真係驚開始變壞   所以要里奧大人快啲食   個生果檔呃人嘅   又話無核   都不知幾多核呀   好在個西瓜仔甜咋   唔係我就會勁唔開心㗎喇 ~

~~~~

今朝里奧大人請病假   見佢唔駛番我都想唔番工呀 ~

學生開學喇   所以成日要排好耐隊   成 9 點先到公司附近   但我堅持會食埋早餐先番工   食餐蛋治烘底 + 奶茶 ($16)  食完人都精神啲呀 ~

番到菇場悶到嘔茄   但好在精神 ~

晏晝去 IKEA 睇狗仔床   可惜無貨   要聽日先有   咁即係聽日要去 IKEA 食 Lunch 啦 ~

一個人食求其算喇   買燒賣牛肉 + 炒麵 ($17)   諗住唔夠先食炒麵   又諗住 $7 唔方多   但原來都好大盒   不過就咩料都無   得幾粒蔥   不過食完個 Lunch 真係飽到上喉嚨呀 ~

~~~~

今日好開心   因為不知不覺同里奧大人渡過咗 8 個年頭 lu   時間過得好快呀 ~

呢 8 年當中有好開心有好唔開心   但希望從今日起每日都過得快快樂樂啦   因為做人唔開心真係好無謂呢 ~