煎三文魚扒 + 蕃茄蜆肉扁意粉 ( 11-DEC-2013 )

( 11-DEC-2013  WED )

尋晚瞓瞓下覺得凍添呀   希望快啲凍定啦   唔好時凍時唔凍囉 ~

今朝無啦啦勁想食腿蛋治烘底   不過食完好鬼飽 ~

番到菇場唔太忙   終於可以抖抖喇 ~

Lunch Time 又未餓   所以出去行下   幫埋菇場去完超市拎茶包   之後經過菜檔   順便買埋節瓜同車厘茄   咁今晚就唔駛去街市 lu   呵呵 ~ 

差唔多 1 點有啲餓   所以買豬扒五香肉丁出前一丁番菇場食   下次都係食雞翼好啲   太多肉喇 ~

4 點幾又有嘢整   好在好快搞掂   最鬼驚呢個時候有嘢做   臨近放工嘛   會零舍緊張   哈哈 ~

今晚超爽   真係好鍾意唔駛放工去買餸嘅感覺呢 ~

番到屋企又開機洗衫   之後煲中藥   抖陣就預備晚餐 lu ~

今晚我食番隔夜嘢咋   所以 7 點半可以開飯   咁里奧大人 7 點 45 分先放工   打嚟話今晚放咁早   不如出去食   我話 7 點 45 分都唔早啦   但佢話上次呢個時候打嚟   我話早喎   真係唔記得喇   我話呢啲時間打嚟係最忙   所以都係求求其其敷衍答佢㗎喇 ~

佢又未咁快番到屋企   咁我都沖埋涼先喇   成日覺得煮完飯未沖涼好污糟咁   真係坐梳化都坐得唔安樂 ~  

是日晚餐 - 煎三文魚扒 + 蕃茄蜆肉扁意粉

煎三文魚扒 - 一田買嘅三文魚扒真係好好食   又厚肉   最緊要係完全唔腥呀 ~  

蕃茄蜆肉扁意粉 - $12/2 磅   好耐無煮車厘茄喇   今次煮嘅扁意粉份量非常之好   只係食一餐嘅  Lunch Box   唔駛又食幾餐   不過今次煮得比較酸   是但啦   無試味係咁㗎喇   哈哈 ~

里奧大人又食剩少少   咁我叫佢擺落我 Lunch Box 度啦   之後我離遠見到個 Lunch Box 係爆哂   佢仲蓋實   我鬧到佢飛起呀   雖然係 Lock Lock 盒啫   但都可能會漏汁家嘛   一陣漏哂落袋咪煩啦   紅色呀大佬   我坐小巴係將個袋放喺大脾家嘛   一陣人哋以為我漏咩就慘咯   之後佢話又係我叫佢擺落 Lunch Box 度   但我話都要睇情況   咁可以講話裝唔哂家嘛   無人叫你格硬係咁放哂囉 ~

今晚里奧大人 11 點唔夠就瞓   不過之後我都瞓喇   我想 11 點瞓覺呢 ~