勝利大排檔 @ 九龍灣 ( 28-DEC-2013 )

椒鹽墨魚咀白飯魚

 欖菜肉鬆四季豆

中式焗牛柳

豆豉鯪魚油麥菜

( 28-DEC-2013  SAT )

壞咗鬧鐘   真係瞓得唔係咁好   成日都驚唔知醒咁樣 ~

8 點起身   因為星期六車程實會暢順   唔會塞車   鬼咩   邊有人番工㗎   我次次同人講星期六要番工   佢哋都好愕然   之後再加多句 : 咩妳星期六要番工架 ?!   簡直係傷口上灑鹽 ~

早餐食五香肉丁雙腸米   辣辣哋真係唔錯呢 ~

番到菇場抖咗陣   之後又忙咗陣   但啲時間都過得好慢咁   哈哈 ~

放工即走喇   今日有師傅嚟整鋁窗   所以 2 點前一定要番到屋企   差唔多番到屋企收到師傅電話   話要 2 點半   是鬼但啦   我話 2 點半好喇下   因為我仲有其他嘢要做   唔好遲   因為佢哋上次遲咗 2 個鐘   好鬼驚 ~

同里奧大人去 Cafe Lagoon 食 Lunch   我都係鍾意食 Tea 多啲   因為份量唔駛咁多   我食完之後飽到上喉嚨   所以叫里奧大人番屋企先   我就行去街市買餸喇 ~

忌廉湯 / 麵豉湯

焗肉醬意粉 

瑞士汁炒牛河

2 點半同埋師傅一齊搭 Lift   原來又係上次整鋁窗嘅師傅   我仲以為得佢一個嚟整   即係好簡單好快搞掂啦   點知一出 Lift 就見到成條走廊都係工具   里奧大人仲話 2 個師傅已經整緊添   估唔到咁大工程   之後見佢哋係拆哂啲窗出嚟再換窗較   真係見到都驚   又無安全帶   勁危險呀 ~

家姐 3 點幾上咗嚟整 Tab   佢慘喇   諗住用 Tab 玩 Pakopang   點知原來玩唔到   玩完一次就死機   最最最慘係佢本身喺 Iphone 玩嗰啲分無哂   道具鑽石車厘子全部無哂   佢勁想喊   哈哈哈哈   里奧大人唔敢出聲呀   之後話好在唔係佢叫喺 Tab 玩   唔係就變咗罪人   呵呵 ~

鋁窗師傅差唔多 5 點先搞掂呀   好在又唔係整到烏糟臘邋遢   唔係又排執 ~

家姐 5 點幾喊住走喇   哈哈哈哈   之後我就做清潔啦   抖陣就預備晚餐喇 ~             

滾番熱啲湯   諗住煮飯嘅時候   水姑打比里奧大人   好開心咁問佢今晚同唔同佢食飯 ?!   不過我話整好哂嘢   唔想去呀   不過之後我話算啦   去陪佢食啦   難得佢咁開心叫人同佢食飯   咁飲埋湯就出門口喇 ~

去到我又買燒賣食   因為煙煙韌韌實在太好味喇   哈哈 ~   

幫埋水姑買嘢   差唔多 8 點先去大排檔   最搞笑係我同水姑一齊向左行   里奧大人問我哋去邊   因為大排檔係右邊家嘛   之後我話習慣一出去就係去水姑屋企嘛   佢話根本我就係唔認路   哈哈 ~

食到 9 點幾   之後上水姑屋企傾下偈   佢比咗晴晴張單人電毯比我   其實我想買電毯好耐   但又唔知邊個牌子好   佢話張毯係德國造   佢又用緊   所以話無咩問題   佢話有時半夜去廁所   去完入番被竇係暖笠笠係最正   咁又係呀   咁鬼凍   半夜去完廁所再上床瞓   真係要典幾典先暖番啲咋 ~

原來傾到 10 點半   所以坐小巴番屋企喇 ~

番到屋企即沖涼   里奧大人就幫我整張電毯   隔咗陣就瞓下張電毯   真係勁暖呀   不過我未吹乾個頭   所以唔可以瞓住 ~   

今晚又係 12 點先瞓    好在聽朝可以 10 點起身啫   嘻嘻 ~