菠菜粟米沙律 + 帶子刺身 + 越南虎蝦刺身 + KFC (外賣) ( 29-DEC-2013 )

同奇異果差唔多 Size

2 個辣雞餐

喺 MCL 換㗎   因為 31/12/2013 到期   

( 29-DEC-2013  SUN )

瞓住張電毯又幾好噃   起碼隻腳唔會凍嘛   但瞓瞓下又會覺得有啲熱   我會伸隻腳出嚟   到隻腳開始凍番呢   又伸番隻腳入去   所以里奧大人話我黐線   叫我唔好用電毯喎   呵呵   但成晚暖笠笠真係好舒服㗎噃 ~               

今朝 9 點半都醒咗 lu   梳洗之後就去大快活食早餐 ~

食完就番上屋企   抖陣就沖涼   再抖陣就番教會喇 ~

奉獻完之後就走喇   因為約咗媽咪同家姐飲茶呀 ~

飲完茶都 3 點 lu   同埋家姐一齊去九龍灣   之後就各自歸家喇 ~

里奧大人話之前喺大班買嘅蛋撻好好食   所以想食喎   買三送一 ($12) 真係抵   因為就咁 1 個腸仔包都要 $7 呢 ~

熱辣辣好味呀   同埋好似食緊燉蛋咁   好滑呀   最緊要係個曲奇皮唔厚   同埋唔漏呢 

喺屋企越坐越凍   但越凍反而就更加唔願郁   其實勁想瞓㗎   不過驚夜晚瞓唔到   所以唔瞓喇   咁就去煲中藥同燉肉汁啦   里奧大人就唔理㗎   照瞓   瞓到 5 點幾 ~

我都開始預備晚餐喇   天氣凍   尋日 5 點幾已經拎啲刺身落下格解凍   解咗一晚都未解凍哂   最後都要拎出嚟室溫解凍   如果唔係今晚無得食   哈哈 ~

7 點落樓去 KFC 買 2 個套餐   排咗好耐隊   家姐又已經去完 MCL 換爆谷   所以嚟 KFC 度 Join 我哋   佢嚟到都仲要等咗陣先到我哋呢 ~

是日懶餐 - 菠菜粟米沙律 + 帶子刺身 + 越南虎蝦刺身 + KFC (外賣)

菠菜粟米沙律 - 尋晚洗好咗啲菠菜   今晚一定要食   咁家姐又鍾意食粟米   所以就咁整啦   撈埋日本芝麻醬真係幾好味   但唔加芝麻醬就無味㗎喇   因為里奧大人無加   所以話唔好食 ~  

帶子刺身 - 其實食 2 隻都已經好飽肚   所以呢   食完今次之後   應該要隔一排先想食   哈哈 ~  

越南虎蝦刺身 - 要好有心機拻㗎   因為太細隻喇   其實我根本都唔係要呢啲甜蝦   我係想要泰國生蝦嗰啲咁大隻家嘛   今次有啲比人呃嘅感覺   同埋之前同 8 卦一齊團購   佢就自己去拎   咁加 $10 就可以轉大隻啲嘅生蝦   就係佢哋原本 Show 出嚟叫人團購嗰啲生蝦 ~

KFC (外賣) - 刺身生冷嘛   所以要食啲熱氣嘢去中和番呢 ~

家姐一路食一路話凍   咁又係嘅   又刺身又汽水   點會唔凍喎   里奧大人都話凍冰冰食埋啲凍嘢   哈哈   無計啦   因為啲帶子話要 2 星期內食哂   對上食嗰次係個幾月前   再唔食就驚壞嘛 ~

今日我燉咗啲肉汁   比咗碗家姐試下   如果佢接受到   下次再燉埋比佢呢   佢 9 點幾都走喇   因為我屋企實在太凍喎   呵呵 ~  

里奧大人沖涼先   之後到我沖   佢沖完之後   成間廁所暖笠笠真係好鬼正 ~