脆肉瓜炒扎肉 + 老少平安 ( 14-OCT-2015 )

賣相超核突   哈哈   下次真係要整啲蔥花上面先

( 14-OCT-2015  WED )

今朝里奧大人明明 7 點 10 分起身   諗住今朝喺公司見客   早啲起身去食早餐   點知到我 7 點半起身   我仲見到佢刷牙   原來佢話一入廁所就見到隻小強喺牙刷盒上面   咁一定要殺佢啦   但小強走得好快   唔知走咗好邊   佢索性用水周圍沖   好在殺得死佢   之後佢要抹番乾淨地方   所以搞到遲哂囉   咁我又快快手手刷牙沖涼   同埋佢一齊出門口呢   但其實我都唔知要咁快做乜   哈哈 ~

早餐食芝腿治   懶得諗呀 ~

菇場唔忙   傾下 Skype 都已經 Lunch Time 喇 ~

其實今日帶咗 Lunch Box 㗎   不過 8 卦無啦啦問我出唔出去食   咁出去食啦   因為我仲爭佢餐生日飯嘛   今日終於請咗   唔駛我成日記住呢 ~

個人又心急又論盡   咁要拎飛嘛   咁我一拎完飛就衝出門口   我頂   唔記得係對自動門呀   好在 8 卦雙手按住我膊頭咋   唔係撞埋去都似   但唔知係頭先驚得滯定瞓得唔好   無啦啦右邊膊頭扯住痛呀   嗚嗚 ~

食完又去買零食   番到菇場啱啱好開工 ~

喺萬寧買㗎   $9.9/支   細細支唔錯   同埋好潤呀   聽日再買多幾支先

仍然 Hea 住等放工   今晚去街市買餸呀   番到屋企預備好哂就即刻用漂白水拖地   勁攰呀 ~

里奧大人今日見客再去會場比辦個客   點知個客唔記得   又要番番酒店比佢   所以 7 點半先番到屋企   如果唔係會早半個鐘就番到呢 ~

是日懶餐 - 脆肉瓜炒扎肉 + 老少平安

脆肉瓜炒扎肉 - 今晚買咗 1 份脆肉瓜   有 3 條架   但尋晚食剩一碗西蘭花嘛   所以煮 1 條算喇   加埋尋晚食剩嘅扎肉   用海皇醬一齊炒   終於又清埋樽醬   呢下最開心呢 ~

老少平安 - 今次買 $10 鯪魚肉   但都食唔哂   里奧大人根本食好小   之後話整一個脆肉瓜炒扎肉就已經得   咁今晚 Share 食一個丁麵嘛   佢食麵又唔話飽   所以佢食剩幾飽   我一嘢拎去倒咗去   佢以為我講笑   之後又話一個餸就夠   我發火話 "得啦得啦   之後唔煮喇   唔駛煩"   我真係覺得佢好 Q 煩   出去食又唔見話叫一個餸   如果出去食都係叫一個餸   我唔會咁火滾囉 ~

星期六打完邊爐   之後又咖哩雞   加埋又唔夠瞓   所以爆哂瘡呀   牙肉又腫   里奧大人又係話牙肉腫   咁我去明星買 2 碗綠豆沙清清熱氣   里奧大人見到係綠豆沙   即問我驚唔驚太涼會暈   我話 Feel 到自己非常燥熱   所以唔食唔得啦 ~

$8/碗   雖然甜咗啲   但八蚊雞就唔好有要求咯   好記得初初結婚無湯水嘛   所以媽咪煲咗綠豆沙   我食咗幾碗   仲食咗好多一塊塊嗰啲   之後第朝番到屋企起身頭暈暈呀   勁驚囉   後尾先知原來海帶係好涼   所以真係好耐都無食喇   除非打完邊爐食一碗仔走海帶就無問題   但就唔無啦啦叫碗來食囉      

差唔多 9 點出去徑步   今晚徑咗 30 分鐘就夠喇   我覺得有啲攰 ~

沖埋涼就食沙律   終於清埋啲沙律喇   唔知係咪又因為我啲沙律有紅腰豆同煙肉碎   所以個人咁燥熱呢 ?!

11 點幾瞓喇   呢排涼咗   一到 11 點就開始有睡意   實在太好喇 ~