肉醬扁意粉 ( 30-OCT-2015 )

( 30-OCT-2015  FRI )

又到 Friday 喇   呢排好忙   所以覺得啲時間過得勁快呢   好多嘢都好似啱啱發生完   但其實講緊嘅可能係一個月前 lu ~

里奧大人每逢星期五都會早啲起身   咁就可以喺公司附近慢慢嘆個早餐   相對我又要早啦   所以我要食啲款多嘅嘢   即係好似麥皮餐咁   食完一樣到一樣   咁樣可以坐耐啲   哈哈 ~

菇場忙呀   其實忙嘅感覺真係好   攰就係攰啲   但起碼個腦會郁下   有時悶起上嚟   個腦都鈍啲咁㗎 ~

Lunch Time 出去食粥   因為我好想食完行下呀   萬寧無啦啦又會員 9 折   又買咗啲嘢咁囉   真係賤物鬥窮人呀 ~

Kinder 繽紛樂買 2 件有 88 折再有 9 折 (原價 $18.5/件) / 洗手液就 $8.5 換購 1 樽

菇場仍然忙呀忙   最恐怖係 5 點 31 分有同事 Intercom   原來佢話一陣會放低啲嘢比我聽日做   驚我聽日一番嚟唔知咩事啫   之後我問佢係咪唔番 ?!   佢話唔係   我心諗妳聽朝講到得啦   同埋啲嘢前日先做過   點會咁快唔記得呀   哈哈 ~

懶呀   所以放工去 Taste 買免治豬肉   買盒最小嘅   要 $13.8   其實我就咁食茄汁雜豆意粉都得架   不過費事里奧大人嫌太 Dry   雖然   佢成日話唔鍾意食肉   但次次都係第一啖係食肉先囉 ~

番到屋企預備好哂就拖地   里奧大人 6 點 45 分打嚟話放工   咁我可以抖陣先煮嘢喇 ~

是日懶餐 - 肉醬扁意粉

肉醬扁意粉 - 好似一大盆意粉咁   但其實 2/3 係雜豆 + 紫洋蔥   扁意粉只係一碗仔   因為唔知係咪頭先食咗個芒果   所以唔係咁餓   如果唔係就會煮多啲意粉喇   好在里奧大人話好味   唔係我會練死佢   因為事實扁意粉真係好少囉 ~

佢隻腳仲痛   所以唔徑步   但我會照徑囉   佢話佢一陣同我一齊出去   坐喺 啲櫈度睇住我徑步   哈哈   黐線 ~

我話好想參加毅行者呢啲比賽   不過好似要行 24 小時定咩   佢大笑話好呀   我話我可以行 50 個圈喎   條友即同我偈呀   話行 50 個團只係得 2 個鐘   唔該妳行掂呢 50 個圈先講 ~

好啦   發完夢就去洗埋碗   抖到  8 點半就出門口 ~ 

徑咗 40 分鐘   流下汗嘅感覺真爽呢 ~

沖埋涼   睇報紙啦   我多數第一樣嘢係睇下萬寧同超市有咩特價   里奧大人一睇到係超市嗰版   就即刻笑住話我只係睇食嘢嗰版   我話因為咁   我幫佢慳唔少錢呀   真係呢 ~　   

之後睇下電視   我自己 11 點就瞓先喇 ~