Babymama: 城門水塘 + 金坊泰國美食 @ 荃灣 (PART 2/2) ( 17-OCT-2015 )

( 17-OCT-2015 SAT ) - PART 2/2

里奧大人話上次明明行咗個半鐘就行完點解今次唔影相唔食嘢行咗個半鐘都未到喎 ~

又見到馬騮

3 點 45 分喇繼續向前行

心心樹葉

呢個小朋友勁啦一路行一路食蕉里奧大人忍唔住叫佢哋小心馬騮落嚟搶呀不過個媽媽話唔驚因為爸爸喺前面喎

仍然係轉右去荃灣方向

突然間好多人呢班學生應該參加學校活動我聽到老師話要趕住搭番車話 15 分鐘就會到坐車位置但我哋由菠蘿壩沿路行到嚟呢度都要差唔多 45 分鐘喎不過佢哋可能係另一邊方向啦

勁呀可以同馬騮一齊坐個女仔喺背囊拎嘢出嚟隻馬騮都無樸埋去佢度

隻馬騮聞緊個粟子包裝袋我覺得佢哋好可憐呀嗚嗚

望多啲綠色嘢

我覺得真係好熱所以就算一陣要見阿 mi 我都忍唔住紮起頭髮行山因為我成日覺得紮完啲頭髮之後個型會變哂但今次唔鬼理喇因為真係流哂汗好驚又出汗癬呀同埋揹背囊會令到成個背脊濕哂所以我斜揹唔想成件衫都有汗哈哈

又上斜好熱呀

一落斜就覺得就嚟落到山咁但其實唔係囉

穿窿葉

仍然係好曬

休息一下先

好似有排都未到咁喎但阿奧話上次行咗個半鐘就落山但依家已經行咗個半鐘喇已經無食嘢同狂影相喇喎佢話因為我無用行山杖所以行慢咗

已經 4 點半喇所以繼續快快向前行

里奧大人叫我影飛機話好少咁近距離見到喎我話唔係呀嘛頭先一路行都一路見到啦

女朋友 Zoom 到最盡㗎喇所以佢叫我影嚟對比下囉

仍然係上斜

嗚嗚嗚嗚我想行平路呀

又有 3 隻流浪狗計埋佢哋我已經見到 6 隻流浪狗喇

到唔知邊喇

行到呢度見到好多人佢哋啲衫係掛住 Number 嘅同埋好多都有 2 支行山杖一齊用我覺得唔似開始行囉因為睇佢哋都好 Pro 咁行呢度對佢哋嚟講係無難度囉

呢個堅叔啦企咁高我一定唔會囉哈哈

行到呢度就見到好多人開始食嘢同飲嘢同埋我同里奧大人都開始加快腳步見人過人見車過車呀因為已經 5 點 10 分喇

到個牌係印住 "圖滕路線" 所以上網睇下係咩來唔怪得我見到有啲人嘅臉係畫咗圖案啦原來如此

10月17日的「康宏圖騰跑2015」， RunOurCity 將與一眾野人來個多元層次、色彩斑斕並合諧共融的部族派對，以汗水意志，為以長跑訓練為青少年的生命帶來改變的「街跑少年」，及以致力種族共融及爭取人人平等的學習機會的「香港融樂會」而發力！活動分別設有16公里體驗組、16公里享受組及57公里搏鬥組三個不同賽事，沿路送上游擊支援，並於終點進行圖騰盛會，讓出戰野人為自己留下圖騰印記。

又有流浪狗出沒啦今日總共見到 7 隻流浪狗希望佢哋搵到嘢食啦

5 點半去到小巴站叫里奧大人排隊先因為要起碼等 6 架小巴呀咁我就即刻去廁所之後買罐忌廉飲實在太熱喇 ~

睇住有 3 架小巴上嚟仲以為好密不過里奧大人都話如果有的士都坐嚟係就係有的士但就入去燒烤場嘅之後又載番人出來囉但好奇怪頭先打的上來司機話唔入去嘛我仲以為唔比入添原來係佢唔入去啫 ~

嗰 3 架小巴走咗之後我哋要等啦 5 點 50 分上車 6 點落車 6 點 02 分到金坊遲咗 2 分鐘激死我又係遲到我發覺次次約阿 mi 都係我遲到真係唔好意思囉 ~

5 點 28 分到菠蘿壩小巴站喇但見到好多人排隊囉所以如果有的士就照坐喇唔想遲到

5 點 52 分落到去唔知邊不過再行前少少轉幾個彎就會到兆和街呢

一去到唔見阿 mi 勁驚以為去錯地方之後我再行入啲就見到阿喂喇其實係第一次親身見阿喂㗎咋好在見過佢啲相囉唔係我會即打比 mi 問佢喺邊哈哈 ~

我同里奧大人一坐低我好似就咁同阿喂 Say Hello 之後阿 mi 出來問我有無互相介紹 ?! 我話無呀哈哈之後由阿 mi 親自介紹握握手做個好朋友阿喂應該唔舒服因為佢隻手好凍哈哈 ~

阿 mi 又比手信我哋呀真係唔好意思啦我又捉唔到馬騮比佢哋只得兩梳蕉所以叫佢下次真係唔好再買嘢比我哋唔好嘥錢見面食飯就已經好開心呢 ~

好喇唔記得講開咩先之後唔夠 5 分鐘唔記得阿 mi 定阿喂講鬼嘢咁大家都講下啲鬼嘢啦大黑影大白影無諗過第一個話題係鬼嘢囉 ~

我其實唔餓所以叫咗 3 樣嘢食先唔知係咪頭先飲咗罐忌廉因為我好少一口氣飲哂一罐汽水架可能咁樣好脹胃啦 ~

阿喂好搞笑囉叫完 3 樣嘢之後眼甘甘望住個 Waitress 之後好怕怕羞羞咁講咗 3 個字嘅泰文好在我知唔係 "我愛妳" 咁解咋哈哈不過佢啲眼神真係好冧個女仔咁囉呵呵 ~

青芒果絲沙律 - 以毒攻毒等阿喂可以快啲好番呵呵我其實唔餓食咗一啖咋唔知辣定酸哈哈但見阿喂食得津津有味囉佢應該好鍾意食呢個沙律

海南雞 (半隻) - 食咗 2 件之後掛住傾傾傾根本唔想食同埋真係唔餓可能成肚水啦我聽到阿 mi 好溫柔咁叫里奧大人食埋隻雞翼尖但其實阿奧只係食燒雞翼嘅雞翼尖同雞皮囉呵呵

燒爐魚 - 一擺條魚上枱我影完相阿 mi 就即刻將個魚頭向住佢佢話知我驚魚頭呢哈哈

蒜蓉包 - 我 Load 相先醒起原來我食咗幾塊唔怪得咁快飽啦仲以為自己咁細食添同埋真係覺得自己掛住講無食過嘢咁㗎

蠔仔煎餅 - 阿 mi 夾比我嘅見到蠔仔肉都幾大粒諗住好開心食啦佢同阿奧無啦啦講海豚點比人殺害我當堂唔想食所以叫佢地轉話題哈哈

鹹魚炒椰菜苗 - 我鍾意食泰式炒椰菜苗架我見到粒啡色嘢以為係炸豬油渣但原來係鹹魚齋食好鬼鹹呢

芒果沙冰 - 我唔飲酒嘛阿喂就只飲熱水行咗幾轉出去斟水對我嚟講係飲好多水㗎喇里奧大人咁鍾意飲水就好呢

象啤 (大) 2 支 - 1 支點夠皮呀但有人怕羞話 Share 2 支就夠喇不過我見阿奧中場有啲呆咗都知佢應該無啦啦眼瞓啦佢次次出街飲親啤酒都話好易眼瞓所以佢覺得阿 mi 好勁面不改容我話今次碎料啦希望下次再嚟可以同埋阿喂一齊飲一 Jar (3L) 因為只有佢哋先可以包底呢

之後講下去旅行有啲地方大家都去過仲要係跟團講講下原來啲時間又差唔多最搞笑阿imi 話我哋會唔會係團友不過我哋講埋啲細節嘢就知道唔係團友呢哈哈 ~

估唔到阿 mi 咁多浪花有啲話題都未講完就講另一個話題真係太多嘢傾喇 ~

無啦啦講起蝗蟲之後講埋巨強講到慶起完全唔記得阿 mi 驚添哈哈不過阿喂話係對生態環境有幫助但其實我唔記得係咪咁講因為我覺得阿強類應該係要殺死囉 ~

傾下食下都好快食完啲嘢咁又再叫過好在今次叫阿 mi 佢哋發板唔係我又係想食拚盤哈哈因為我諗唔到有咩新嘢好食呀 ~

繼續浪接浪好在阿喂同阿奧都知道個老婆多嘢講唔係都幾慘哈哈不過好在佢哋都有一齊接浪所以呢晚傾得非常之開心但個 Waiter 成日話送生果比我哋其實都知乜事啦兜個圈叫我哋走呀所以我哋都埋單喇阿喂覺得唔好意思呀哈哈哈哈咁都明嘅佢哋成日嚟食又會尷尬啲嘅 ~

阿奧去廁所阿 mi 又去但居然唔問我去唔去喎其實我想去好耐㗎喇不過唔想中途離場所以最後要留低阿喂一個唔知佢會唔會覺得我驚咗佢所以借尿遁呢哈哈 ~

不過原來已經食咗成兩個半鐘成 9 點半喇我以為個幾鐘咋唔怪得比人趕啦但其實樓下都唔多人等做咩唔比我哋坐耐啲喎 ~

我哋再企喺門口再傾多陣之後阿 mi 話食糖水不過阿喂話都係坐唔耐所以唔去喇同埋佢都唔舒服早啲番屋企休息都好因為佢個樣都好攰咁呢咁下次約埋行山再食飯可以多啲時間傾偈啦我同阿奧話傾兩個半鐘唔係好耐之嘛我地平時出嚟都傾 3 個鐘啦依家除番開 4 個人每人都得果 40 分鐘邊夠皮呀哈哈 ~

一齊行去小巴站方向我哋上車前 Say Bye 感覺好似送機咁 ~

我坐車嘅時候同里奧大人講話其實本來 1 月約咗阿 mi 食飯㗎之後我諗住再約佢又去旅行之後我又去旅行到媽咪嗰排身體唔好我真係無心情出來咁今次真係好想約阿 mi 囉估唔到一約即成仲要見埋阿喂真係無諗過我哋兩 Pair 會一齊食飯所以今晚真係好鬼開心呀 ~

都唔記得幾點上車總知 9 點 02 分就番到九龍灣今日咁多 02 嘅阿 mi 頭先話我哋番到屋企嘅同時佢哋都應該番到屋企亡命小巴果然超快呀下 ~

番到去即沖涼再食埋個糯米糍里奧大人食先嘛佢話好食喎咁叫佢形容下啦佢極少會話糯米糍好食因為佢唔鍾意食煙韌嘢佢話好 Soft 好新鮮我心諗咪即係唔煙韌之後到我食雖然唔煙韌但真係好似啱啱整出嚟咁好 soft 好新鮮好好味呀唔怪得阿 mi 買嚟做手信啦哈哈 ~