蒜頭豆豉炒茄子魚肉 + 齋滷味 (外賣) + 西洋菜豬骨湯 ( 28-OCT-2015 )

( 28-OCT-2015  WED )

尋晚瞓得都唔錯   感恩感恩 ~

今朝里奧大人話腳痛   原來尋日同叔叔影相   我 Click 倒佢   就係嗰下就扯親啲肌肉 ~

無啦啦突然好想食腿蛋治   好在麵包夠 Soft   所以覺得好好味   哈哈 ~

菇場忙呀   勁忙嗰隻   對手無停過 ~

本來諗住食麥皮   不過想比對眼抖下   所以出去食粥喇   再去買啲零食就番菇場 lu ~

朱古力條 $10/包 / 檸檬糖 $10/包 / 童星點心麵 $11/3 包

里奧大人 Send 咗張外賣相比我睇   佢肯定隻腳好痛啦   唔係唔會叫外賣   之後我話今晚幫佢 "錬" 鬆下啲肌肉   佢話仲驚   哈哈 ~     

仍然做到無停手   有啲唔趕就聽日做 lu ~

差唔多放工嘅時候   家姐打嚟話有湯比我   實在太好   因為我正想滾湯比里奧大人飲呢 ~

放工即走去買餸   之後就企定定等家姐拎湯比我喇   又無啦啦好想食酸齋   所以去 Taste 買完就番屋企 lu ~

預備好就抖陣   里奧大人 7 點放工   抖多陣就開始煮嘢 lu ~

是日晚餐 - 蒜頭豆豉炒茄子魚肉 + 齋滷味 (外賣) + 西洋菜豬骨湯 

蒜頭豆豉炒茄子魚肉 - 第一次咁整   我以前多數會釀茄子   但釀茄子真係要整好多時間   煎咗十年啲茄子都仲係生勾勾咁   所以其實都好耐無整   但上次買咗啲幼身茄子   真係無可能釀到   所以我分開煮   原來咁仲方便   呵呵 ~     

齋滷味 (外賣) - $18 減到 $14 真係好抵   同埋最緊要份量唔好太多呢 ~  

西洋菜豬骨湯 - 我鍾意飲西洋菜湯㗎   不過自己一定唔會煲   因為啲菜要浸好耐   同埋驚有 "其乸"   真係未飲已經嚇死咗咯 ~

碗都未洗   里奧大人叫我一齊落去萬寧買安美露   咁是但啦 ~

番上嚟洗埋碗   沖埋涼就開機洗衫   之後再熨兩機衫   熨咗個半鐘   差唔多 10 點半先熨完   企到腳都痛   嗚嗚 ~

里奧大人就自己用正骨水同棉花紮住隻腳   佢自己一手一腳搞掂㗎   嗰下我覺得自己好衰咁   咩都無幫手   如果我整親呢   佢就會幫我搽依樣嗰樣   所以有時比佢串又真係應該嘅   哈哈 ~

我晾衫嘅時候   里奧大人話 "乜你洗咗衫咩 ?!"   之後佢話駛唔駛咩都一次過做哂喎   我話唔鍾意啲嘢堆埋一次過做嘛   但我其實依家都懶咗啦   頭先搵單據   我話自己擺得實在太好   所以搵唔到   里奧大人即話我啦   自己擺完唔見咗就話擺得太好得滯   哈哈 ~

11 點幾瞓喇   唔好講笑   今晚真係幾攰 ~