嘉華大酒樓 @ 官塘 ( 27-OCT-2015 )

薑蔥魚雲煲

芥蘭炒臘味

豉油雞 (半隻)

( 27-OCT-2015  TUE )

尋晚瞓得都唔錯   可能依家天氣涼涼地   但其實我都仲係開緊冷氣   咁究竟關唔關天氣涼事呢下 ?!

今朝同里奧大人 11 點要喺深圳見客   咁一齊買定個包   之後就去食早餐喇 ~

菇場忙呀   要開行 Turbo 做   因為下午請咗半日假去送叔叔機呢 ~

感恩兩個幾鐘就做哂嘢   可以無後顧之憂咁 Off 呢   哈哈 ~

里奧大人見完客就去上水坐 A43 去機場   咁我就坐 A22 去機場   12 點 45 分開車     咁里奧大人差唔多 1 點 15 分 Send 啲相比我   好似同我去緊嘅地方差唔多咁   咁即打比佢啦   原來佢喺我架車後面   我話我架車好慢   佢話佢架車更慢   因為無理由上水方向去機場會同我差唔多時間到機場喎   所以大家都 1 點 30 分就到機場喇 ~

原來 A22 座位係咁舒服   我第一次坐呢啲坐位㗎咋

約咗叔叔佢地 2 點左右喺 Air Canada Check-in Counter   咁知道叔叔佢哋 1 點半先打的嚟機場   所以同里奧大人去 Muji 睇下嘢   買咗塊鏡 ($39)   之後就去番 Counter 前面坐喇 ~

咁啱有一家人送機   有個婆婆番加拿大   原來佢已經 91 歲喇   我覺得佢好勁   可以坐到十幾個鐘頭飛機   咁之後差唔多要離境   佢個親戚同佢握手   婆婆好唔捨得大力握手喊呀   搞到我都喊埋   我好驚呢啲場面   但最搞笑係佢啲親戚無個喊   哈哈 ~

叔叔佢哋 2 點 15 分到喇   估唔到佢朋友都一齊送機呢 ~

叔叔搭 6 點 55 分機   但見 Counter 有人   所以試下可唔可以 Check-in 先   好感恩係可以嘅   咁唔駛拖住 2 件大行李周圍走嘛 ~

諗住同叔叔去翡翠食嘢   但原來嬸嬸話想食菠蘿油飲咖啡呀   因為佢嚟咁耐都無試過菠蘿油呢   咁一齊去翠華食嘢喇 ~

好開心咁叫咗 3 個菠蘿油   點知落單之後話賣哂   我覺得仲衰過一早話無呀   因為唔好比希望我地嘛   哈哈 ~

我今日覺得好感恩   因為我其實我驚自己坐巴士入機場   好耐之前去接里奧大人機   但去咗機場博覽館   所以又要坐番車出來   咁今日其實都驚落錯車㗎   始終自己論論盡盡嘛   咁啱里奧大人坐嘅巴士又喺我後面   我叫佢差唔多落車就打比我   咁就唔會落錯啦 ~

咁里奧大人今日用 Power Bank 叉電話   叔叔見到即問係咪用嚟叉電   原來大表哥佢送咗個 Power Bank 比叔叔   但無教佢點用囉   雖然呢啲嘢係好普遍   但未用過就真係唔知點用嘛   因為我試過用 Power Bank 叉電   但無推去 "On"   仲好話里奧大人無叉夠電就比我用   勁呀呢   咁我哋買咗 2 支 Sticker 比堂妹   里奧大人都千叮萬囑我一定要教叔叔點用   仲要只係插線嗰隻   真係唔難用   但起碼妳點都要教一次   人哋唔駛嘥時間睇下點用嘛   突然間覺得里奧大人好細心呢   哈哈 ~

坐到 4 點 45 分左右就走喇   之後陪嬸嬸去奇華買杏仁條同花生糖   我開始嚟料喇   嗚嗚嗚嗚   叔叔話唔好喊呀   下次唔比我送機   又話如果我去加拿大   我走又喊   唔得呀   佢話當堂妹大過哂   第時會番來密啲   嬸嬸都鼻紅紅   最搞笑係嬸嬸表妹話比我整到佢都眼濕濕 ~

衰里奧大人話我一個人去加拿大無問題   最緊要 1 Way   正衰佬   我話如果要去加拿大   起碼要用十萬   佢話無問題   最緊要 1 Way   之後話叔叔可以比番二十萬叫我番嚟香港唔該   我話咁我都好着數喎   賺咗三十萬   哈哈   衰里奧大人真係超衰囉 ~

5 點半開車    因為紅磡有啲塞車   所以我差唔多 7 點先去到嘉華呀 ~

里奧大人要做公司嘢   所以都唔嚟食飯喇   我坐低無耐家姐都到   可以叫餸食飯喇 ~

食完去萬寧買嘢   之後番媽咪屋企坐陣   拎埋生果   差唔多 9 點就走 lu ~

沖埋涼   食埋生果   睇下電視   11 點幾瞓喇 ~