蜜糖焗雞扒 + 墨魚卷 + 炸魚皮 (外賣) 菜心苗 ( 1-NOV-2017 )

( 1-NOV-2017  WED )

尋晚瞓得唔係咁好   好似有啲熱咁   但我隻腳又凍喎   都唔知想點   哈哈 ~

真係好攰   要懶床添呀   好在沖完涼之後就精神番啲咁呢 ~

早餐食蕃茄通粉   比咗一半通粉同方包比  8 卦食   好在佢大食咋   唔係就幫唔到我了 ~



菇場忙呀   好在 11 點幾就搞掂   終於可以抖喇 ~

幾經辛苦先買到呢個月曆呀   所以好想快啲到 2018 年呀   哈哈 



Lunch Time 出去萬寧買嘢   之後就番菇場食健康餐   我真係好鍾意飲朱古力奶   但其實好肥   所以間唔中先飲呢 ~



好嘢   仍然 Hea 住等放工 ~

今晚去街市買餸   我去買排骨   我同豬肉婆講話要廿蚊排骨   係食嘅   之後豬肉婆喺度笑   再話梗係食啦   果下我都要咗   因為我覺得好多人煲湯嘅排骨係唔食嘛   所以我強調係食囉   哈哈 ~

買完即番屋企喇   坐車好頭暈呀   好在一陣無事咋 ~

番到屋企即預備喇   里奧大人 6 點 15 分放工   今晚真係要等喇   7 點 15 分先可以開餐呢 ~

是日懶餐 - 蜜糖焗雞扒 + 墨魚卷 + 炸魚皮 (外賣) + 菜心苗    

蜜糖焗雞扒 + 墨魚卷 - 唔想成日食蝦卷   所以試墨魚卷啦   十蚊有 3 條   不過唔好食嘅   口感好腍   雞扒就因為醃咗 2 日   所以點都要焗埋去囉 ~

炸魚皮 (外賣) - 好想食香口嘢呀   所以即買   點都好過食薯片   哈哈 ~ 

菜心苗 - 淥咗半斤   聽晚再食埋剩咗嘅半斤   以前可以食好多菜   即係食剩都格硬食埋去   但依家真係唔得   食到 7 成就覺得好夠   再食多啲個胃會唔舒服咁㗎 ~

今日里奧大人個同事好慘   佢今個星期五 Last Day   咁佢星期三都上大陸   仲過埋夜   諗住交帶哂所有嘢比大陸同事   點知佢阿 Head 同阿水喺開會期間係咁插佢   一樣嘢要佢分開講 3 次   我即時都同里奧大人講   點解唔叫佢哋一次過聽   要人講 3 次呢 ?!   所以個同事都好激氣   佢都係好脾氣同埋係做嘢嘅人   但佢阿 Head 覺得佢唔合作   當住好多人面前打去 Admin 部門   話呢個同事嘅 Reference 只能由佢寫   所有公司打嚟問呢個同事嘅嘢   都要比佢聽   咁即係斷人米路啦   正賤人   所以個同事都慶到即刻番香港 ~

之前成日周圍篤里奧大人個女同事   一知里奧大人遲職咋   依家係咁同里奧大人講阿水嘅不是   之前佢同阿水夾埋篤里奧大人㗎   呢條友都係衰㗎喇   所以里奧大人遲職唔做真係無錯 ~

佢當日係即打遲職信   都係兩句搞掂   咁我話係咪 We regret to inform you that 開頭呀 ?!   佢話係 I would like to 呀   笑死我   我話係咪真㗎 ?!   佢話係喎 ~

洗埋碗就沖涼   今晚唔徑步喇   好頭暈   所以里奧大人自己去徑步呢 ~

敷埋 Mask 就熨衫   當做運動都唔錯 ~

同里奧大人傾偈   傾到 11 點半先瞓 ~