蜜糖焗雞肶 + 黑椒扁意粉 + 菜心苗 + 蕃茄薯仔排骨湯 ( 2-NOV-2017 )

( 2-NOV-2017  THU )

感恩一覺瞓天光呀   前一晚真係瞓得好差   如果再瞓得唔好就慘了 ~

早餐食奶醬多   唔想食鹹嘢 ~



里奧大人今日 Last Day 呀   早餐居然食芝蛋治   平時只係食奶醬多咋   因為無胃口呢   所以好開心見佢食芝蛋治呀   其實見到佢工作壓力大   我都瞓得唔好   好擔心佢嘛   始終佢都係第一次面對呢啲咁衰嘅同事囉 ~

我都遇個一個好衰嘅上司㗎   同事話佢係老闆嘅 2 奶   所以啲同事怕佢又憎佢   有次佢話我飲好多水喎   我話 8 杯好正常   之後就即刻話我成日去廁所   我話飲完水梗係要去廁所啦   唔通忍呀 ?!   講真   我去廁所係好快   放完水就即走   因為我覺得廁所好多菌嘛   咁我其實都諗住唔做啦   點知佢早一步比信我   話公司覺得我唔合適   我即刻好開心話好呀    佢激到雙眼通紅   眼有淚光㗎   因為佢無諗過我咁答佢嘛   我做咗個幾月之嘛   所以我都要 7 日通知   依家佢比信我   我就當日 Last Day 仲要出埋糧   勁爽呢 ~

今朝搞笑喇   我同事搵杯蓋   之後我問佢係咪我手頭上呢隻 ?!   佢話係   哈哈   原來我洗咗佢嘅杯蓋   我以為係自己嘅杯蓋呀   唔怪得我洗嘅時候   都覺得好似唔係咁嘅公仔啦   之後佢話大家都係用 Disney 嘅杯蓋   所以啲 Pattern 差唔多   哈哈 ~

菇場唔忙   咁就好喇   因為今個月尾會好忙   比我依家抖下啦 ~

Lunch Time 食酸辣米線   又開始食到有啲悶喇   咁都好   咁食法好肥㗎 ~



忙下停下   話咁快就放工 lu ~

番到屋企即預備喇   里奧大人都係 6 點 15分放工   但今晚起碼要 7 點 15 分先開飯呢 ~   

姐夫今晚去飲   所以家姐話嚟我屋企坐下   咁我一定預埋佢嘅晚餐呢 ~

是日晚餐 - 蜜糖焗雞肶 + 黑椒扁意粉 + 菜心苗 + 蕃茄薯仔排骨湯  

蜜糖焗雞肶 - 醃咗 15 分鐘咋   所以家姐話無咩味   無計啦   尋晚先拎出來解凍 ~

黑椒扁意粉 - 買咗 4 隻青尖椒同 2 隻紅尖椒   咁都要 $16   其實我覺得好貴   但因為里奧大人同家姐唔係咁鍾意食燈籠椒   同埋尖椒比較辣   家姐一定鍾意   咁我剪尖椒啦   一路剪一路打噴嚏   之後 Feel 到啲手指係慶哂嘅   咁我炒啦   一路炒一路咳   里奧大人又係咁咳   咁我試 1 條啦   我覺得好辣呀   所以我唔同黑椒汁炒喇   驚里奧大人食唔到   但家姐果碟就用黑椒汁炒啦   惹味啲嘛   家姐都話好辣呀   因為佢流鼻水   呵呵 ~    

菜心苗 - 呢度半斤   留咗 1 碗比家姐 ~   

蕃茄薯仔排骨湯 - 用咗 8 個蕃茄 + 1 個薯仔 + $20 排骨   但個湯好酸呀   哈哈哈哈   不過反而家姐話唔酸喎   初初仲驚佢飲唔到添 ~

搞掂哂就去徑步   徑  20 分鐘算喇   因為要整熱啲嘢比家姐 ~

9 點左右來到   即開飯比家姐食啦   2 隻雞肶 + 1 碗意粉 + 1 碗菜 + 1 碗湯   佢清哂所有嘢呀   勁開心   不過就算我煮得唔好味   佢都會食哂嘅   因為佢唔會嘥嘢   如果里奧大人好似家姐咁比面就好啦   哈哈 ~

食完又傾下偈   之後又食下芒果乾   最鍾意一齊食零食   如果家姐鍾意食   下次又可以買比佢嘛 ~

喺清邁 WM 買㗎   但無乜芒果味   哈哈

家姐 10 點半走喇   我送佢去搭車   番到屋企都即沖涼喇   再睇多陣電視   11 點 15 分都瞓 lu ~