齋滷味 (外賣) + 冰菜 ( 19-NOV-2017 )

( 19-NOV-2017  SUN )

今朝 10 點起身   沖埋涼就去食早餐喇 ~

份早餐一嚟到   我同里奧大人呆咗   因為塊雞扒好明顯係切咗一半   咁我問個職員係咪依家得一半 ?!   佢好快答係   咁算啦   咁我件奶油脆豬又係比平時細件咗   以為佢啲早餐縮哂水 ~





咁我問里奧大人   如果你見到隔離食同一份早餐   但塊雞扒係一件嘅   你會點 ?!   點知話口未完   隔離個人真係食雞扒通粉餐   塊雞扒係一件㗎   之後我即搵番個職員   問點解人哋係一件雞扒 ?!   佢即話廚房比咩就比咩   仲即刻同廚房講 "補番半塊雞扒比個客"   我即走埋去話唔駛喇   根本我唔係要番嗰半塊   問題係妳唔好咁敷衍答客人囉 ~

人哋係一件雞扒   我見到嘅時候都話睇定啲先   可能人哋係叫咗 2 Set 一樣   咁夾埋咪一塊囉   但最後發現佢係一個人來食呢 

食完就番崇拜喇   崇拜完畢就去德福行陣   之後就搭地鐵去 APM   咁正想落扶手電梯嘅時候   里奧大人無啦啦就調轉頭走   我仲以為佢有嘢攝住咗喺扶手電梯度添   原來佢見到大眼妹敲個玻璃   所以即刻番轉頭呀 ~

上年我唔得閒   所以得里奧大人同佢一家人飲茶   最邪係頭先我先問大眼妹依家做嘢點樣 ?!   轉個頭先見到佢哋一家   咁耐無見   一傾又傾咗半個鐘   之後即去 Haagen Dazs 拎咖啡   因為家姐比咗張 Free Coupon 比我   好似 30 號到期   所以今日一定要去拎呢 ~

我叫里奧大人揀味啦   佢揀咗隻比利時朱古力咖啡   但其實只係送 Regular 味道    哈哈 ~



3 點先食米線   食完又要行番一陣先番屋企   因為好鬼飽 ~



下星期會凍   係時候要執衣櫃喇   執咗成 2 個鐘先搞掂   呢排瘦咗嘛   所以可以着番 3 年前買嘅衫   買嘅時候以為自己穿得落   點知真係穿唔落   但唔敢比里奧大人知囉   哈哈 ~

真係唔餓呀   所以 7 點幾先開餐呢   今晚我食埋星期五食剩嘅咖哩龍蝦丸同魚片頭   所以就煮丁麵比里奧大人獨享   我食餸就夠飽了 ~

是日懶餐 - 齋滷味 (外賣) + 冰菜

齋滷味 (外賣) - 尋日喺荃灣買架   細盒只係 $25   估唔到份量咁多   下次有機會又再買來食   哈哈 ~   

冰菜 - 又係尋日買㗎   2 斤平啲嘛   咁尋晚食咗 1 斤   剩咗就係我嘅 ~

搞掂哂就等家姐嚟   呢排有啲嘢要佢幫手搞 ~
   
家姐差唔多 8 點幾就嚟到   佢見我食唔哂啲齋又話食埋去   笑死我 ~

咁我買咗人參果嘛   一定要比佢食啦   佢見到就即刻話媽咪以前成日買㗎   但其實個樣唔係咁開心   佢同我一樣   講到媽咪呢兩個字   我哋個樣係即刻會變哂 ~    

家姐差唔多 10 點走人   咁我沖埋涼就休息 ~

里奧大人 11 點就瞓   我話個胃頂住頂住唔舒服   所以抖陣先   之後我話平時都有食齋   但點解今晚唔舒服嘅   之後佢話妳食咗啲咖哩龍蝦丸呀   係喎   我完全唔記得咗添   我有次食完魚蛋又係咁   今次食龍蝦丸又係咁   都係唔可以食咁多   唔係自己辛苦 ~

抖到差唔多 11 點半叫做好啲   所以都即瞓喇 ~