酥炸雲吞 + 煎餃子 + 上海排骨酸辣麵 + 招牌正宗上海粢飯 (外賣) ( 14-JUN-2022 )

酥炸雲吞 & 煎餃子 - 番到屋企食   仍然脆卜卜

上海排骨酸辣麵 - 呢個都好味

招牌正宗上海粢飯 - 即場食係好食好多   起碼油炸鬼係脆   哈哈

( 14-JUN-2022  TUE )

今朝 9 點半自然醒   咁都即刻刷牙洗臉了   里奧大人就去買早餐 ~

食完抖陣又忍唔住執衫   執咗 2 個鐘呀   又可以捐一袋衫出去   其實有啲都無著過   不過預期擺喺度   不如捐出去算喇 ~

1 點半左右食 Lunch   抖到 2 點幾就出發去 Megabox ~

里奧大人話脆辣雞腿包套餐要 $40   我以為聽錯   好似之前只係 $27/set   不過我都好耐無食   可能已經無 $27 㗎喇   但咁價錢真係唔會想再食囉 ~ 

我去 H&M 買 2 條 Legging   之前係 $79.9/條   依家就 $159.9/2 條   好在我都係諗住買 2 條咋 ~

之後里奧大人喺 AEON 買咗 1 件 Tee + 3 隻船襪   最後再行下超市   不過唔買嘢喇   因為要去德福行街 ~

去 MUJI 買麵包   我話想聽朝整麵包食呀   之後再買多 Pack 麻糬就走喇   第一次去 MUJI 無買到零食   勁呀我 ~

再去馬莎睇下嘢   估唔到里奧大人買到 3 件 Tee   質地舒服仲只係 $79.9/件   里奧大人會著裇衫喺面   所以件 Tee 一定要薄呢 ~

到我送衫比里奧大人啦   佢話唔駛   但我話尋日佢送咗衫比我嘛   我都要出番啲錢   所以比錢要鬥快咁   基本上我排隊係已經拎定銀包   佢一定唔夠我快  哈哈 ~

家姐比咗 Haagen Dazs Coupon   所以要食啦   非常之感恩係個場無人   到我哋食完先有對母女入嚟   我依家真係有啲怕喺出面食嘢   同里奧大人都接近半年無出街食嘢喇 ~

Mini Happy Forever 快樂無限 ($119)

紅桑子雪菓 & 雲呢嗱焦糖朱古力蛋糕 & 車厘子黑莓

朱古力 x 雲呢嗱 & 朱古力 x 士多啤梨

芒果紅桑子 & 香檸雪菓 & 曲奇雲呢嗱

食完去淘大買菠蘿乾   本身諗住買 2 罐就走   但最後買咗菠蘿乾同芒果乾   桑寄生同椰棗   咁啱超過 $300   所以可以即做會員平 $20 ~

里奧大人用支付寶付款又可以平 $10   但佢唔記得按即用 Coupon   之後職員好好再幫我哋整   咁就可以用到喇   因為我下個月真係唔會記得用囉   同埋又唔會成日嚟買嘢   所以好感激呢位職員幫我哋呀 ~

里奧大人話放假唔好煮   我話其實煮都無所謂   又唔係煮大龍鳳   佢話就係想我放假休息   呢樣佢真係好好嘅  次次放假都唔比我煮飯 ~

咁去元氣買壽司啦   到比錢嘅時候   職員話要等半個鐘   咁一定唔等啦   所以里奧大人話買上海嘢番屋企食   咁又好喎   好耐無食   哈哈 ~   

番到屋企都差唔多 7 點   都即開餐喇 ~

食完就一齊去家品店睇嘢   之後買埋生果就番屋企 lu ~

沖埋涼都即休息   今日行咗好多路    真係有啲攰   哈哈 ~

泰國芒果乾 & 菠蘿乾都係 $30/罐   熟青仁黑豆粉好似 $38

睇下電視   今晚 11 點幾都瞓覺喇 ~