水餃拚雲吞 (外賣) + 絲瓜魚蛋鮮冬菇湯 ( 28-JUN-2022 )

( 28-JUN-2022  TUE )

尋晚半夜去廁所   之後好難先瞓得番呀~

今朝鬧鐘響   里奧大人話佢無校鬧鐘   我都迷迷糊糊答佢鬧鐘響咗囉   咁到我起身   一望個鐘係 7 點 38 分   原來頭先係我鬧鐘響   唔怪得里奧大人話我唔明佢講咩啦   哈哈 ~

我都遲咗一班車   不過無咩所謂   反正番到菇場都有時間食早餐呢 ~

早餐食奶醬多   依家唔會連續食   所以覺得好味啲   哈哈 ~

菇場忙下停下   呢排冷氣唔夠   好易焗到眼瞓 ~

Lunch Time 出去行下   又忍唔住買咗 2 Pack 罐裝咖啡   之後再去買鯪魚球米番菇場喇 ~

食到流哂汗   我直頭要拎把風扇仔吹住條頸 10 分鐘   我先可以再食   真係熱到無朋友   哈哈 ~

終於忙哂啲煩嘢   實在太開心了 ~

不過我焗到中眼瞓   之後我問阿渠冷氣熱唔熱 ?!?!   佢都好愕然話: 熱唔熱 ?!?!   我話焗到痴咗啦   其實係想問凍唔凍呀   哈哈   佢話天氣太熱   所以冷氣唔夠凍呀 ~

放工即走   估唔到又可以同里奧大人一班車 ~

番到屋企都預備晚餐   本來今晚想跳舞   但個人真係好攰   所以唔跳喇   叫里奧大人沖涼先 ~

是日懶餐 - 水餃拚雲吞 (外賣) + 絲瓜魚蛋鮮冬菇湯

水餃拚雲吞 (外賣) - 上兩星期買㗎   所以我想清埋去啦   放喺冰格真係唔記得佢嘅存在 ~

絲瓜魚蛋鮮冬菇湯 - 好耐無飲湯   咁就整個簡單湯水喇 ~

洗埋碗就沖涼   差唔多 8 點半就同里奧大人一齊睇 "盡情吃 用力愛" ~

我再睇多陣 Youtube   今晚 11 點唔夠都自己瞓先喇 ~