辣汁牛肉炒刀削麵 + 焗豆腐卜 + 銀絲旺菜 + 紅豆糭 ( 7-JUN-2022 )

( 7-JUN-2022  TUE )

尋晚瞓得都唔錯   但如果唔駛去廁所就更加好   哈哈 ~

早餐食奶醬多   唔餓嘅最好選擇   同埋落雨唔想行咁遠呢 ~

菇場唔忙呀   又係同阿花 Whatsapp 過日晨 ~

呢兩日換新電腦   BG 拎起我個電腦 Mon 睇後面資料   佢話我個 Mon 後面好乾淨   我話成日抹㗎 ~

本身里奧大人比咗無線 Keyboard 比我   我都諗住換   但依家有新電腦新 Keyboard 用   真係好感恩呀 ~

Lunch Time 去買菜   之後買水餃河即番菇場喇   我睇住個天由光變為黑再落超級大雨   但奇怪啲人唔帶遮囉 ~

索哂啲湯   好似撈河   哈哈

仍然唔忙   放工可以準時走 ~

番到屋企即預備晚餐   今晚里奧大人 7 點幾先番到屋企   咁都好   可以多啲時候預備   哈哈 ~

是日晚餐 - 辣汁牛肉炒刀削麵 + 焗豆腐卜 + 銀絲旺菜 + 紅豆糭

辣汁牛肉炒刀削麵 - 我都完全唔記得有刀削麵嘅存在   所以得閒執下廚柜真係好重要   哈哈 ~

焗豆腐卜 - 之前喺 Taste 買素水餃同豆漿   買滿 $30 就送豆腐卜   咁焗埋去啦   咩都無蘸就咁食   我覺得都好味喎 ~    

銀絲旺菜 - 其實唔知同旺菜有咩分別   見佢有 1 Pack 買先買呢 ~   

紅豆糭 - 終於清哂喇   但仲有兩隻糭未食   因為係里奧大人同事比嘅   我哋話唔要   但佢哋係都比   仲話有多可以要埋   我同里奧大人講千奇唔好要喇   加加埋埋食咗 11 隻糭真係好多囉 ~

洗埋碗就開機洗衫   抖陣就同里奧大人跳舞   好耐無跳喇   所以跳住 1 Part 先 ~

沖埋涼就同里奧大人一齊睇 "盡情吃 用力愛"   我好鍾嘅呂珍九㗎   加埋文佳瑛就仲更加要睇   哈哈 ~

不過睇到 11 點都瞓   今晚有啲攰呢 ~