煎釀三寶 + 馳名狗仔粉 + 山葵八爪魚軍艦 & 希靈魚壽司 (外賣) ( 25-JUN-2022 )

( 25-JUN-2022  SAT )

今朝 7 點 20 分醒咗   但都繼續瞓   因為星期六唔會咁早番工呢 ~

早餐食奶醬多   今次整得好味   以前鍾意大火夠乾身   但依家覺得大火太乾身   哈哈 ~

.

菇場唔忙啦   又係同阿花 Whatsapp 到放工 ~

放工去買午餐就番屋企喇   今日里奧大人補假   又可以陪我食午餐 ~

餸同米線要分開上

食完就睇 Youtube   之後 3 點左右就瞓咗半個鐘   咁我一起身就抹嘢   里奧大人話我係咪痴線㗎 ?!   一起身無啦啦就抹嘢   不過我真係咁㗎喎   可能我想郁下   哈哈 ~

做咗陣小清潔就沖涼   咁等個人更加精神呢   因為要做功課呀 ~

6 點就出發喇   因為想買朱古力比 Miss 呢 ~

行行下又買咗 6 罐無基因改造嘅粟米   其實好鬼重   不過想買囉   因為唔係成日做特價嘛 ~

買完就即去買朱古力   咁番學校一拎盒朱古力出嚟   見到個開口係揭開咗呀   唉   我已經好小心放入袋   仲特登唔唔開個袋拎嘢   點知都出事   嗚嗚 ~

所以又要飛落去再買盒新啦   雖然真係啱啱整到   但始終咁樣送比人就唔好囉 ~

明明我係無出汗   但買完番到學校   我係成頭汗   唔知以為我遲到   哈哈 ~

估唔到同學仔都送盒餅比 Miss   咁我哋放學之後就即刻送比 Miss 呢 ~

買埋晚餐就番屋企   呢排好鍾意食壽司   因為我自己去買   如果同里奧大人一齊   佢肯定唔會比我買   呵呵 ~

我同里奧大人講話同學仔都送餅比 Miss   佢即刻話咁 Miss 肯定教得好啦   唔係同學仔唔會咁有心呢   所以我成日話 Miss 教得好   真係唔係我主觀感覺呢 ~

開口揭開咗呀   咁留比里奧大人喺屋企食啦   哈哈

抖陣就沖涼   睇下 Youtube 又差唔多 12 點先瞓 ~