肉碎蒸豆腐 + 蔥花蛋炒飯 ( 2-JUN-2022 )

( 2-JUN-2022  THU )

感恩一覺瞓天光呀   諗起聽日開始連放 3 日就好開心   起身都起得快啲   哈哈哈哈 ~

早餐食芝腿治烘底   應該都有成個月無食   所以覺得勁好味呀 ~

晴晴問杯飲品係咩 ?!   點解搞勻都咁嘅色 ?!   我估少奶係咁啩   哈哈

菇場忙呀   終於食飯前搞掂好長命 Report   咁晏晝應該可以抖下 ~

Lunch Time 去買蘋果買菜   再去一田買嘢比家姐   足足用咗 1 個鐘呀   所以買完即拿拿聲買粉果同炒麵番菇場呢 ~

熊本熊昆布烏冬杯麵 ($22.9/2盒) - 買比里奧大人喺公司食嘅

新多利西柚汁 ($37.9/4支) - 買比家姐嘅   佢都鍾意飲呢   

袋裝牛油果 ($24.8) - 我覺得好平就即打比家姐   之後佢話要呀   咁買完就聽日可以比埋佢喇

終於喺一田買哂要買嘅嘢   呢幾日其實買咗接近 $1,000   如果單一簽帳好似減 $50   但係我想買嘅嘢   都係唔同嘅優惠日子   所以點都要去兩轉   咁今次我買嘅嘢   買完再問里奧大人同家姐鍾唔鍾意 ?!   佢地又話鍾意   咁我又要去多轉啦   呢幾日同事見我日日去一田   佢地以為我好鍾意一田咁呀   哈哈 ~

菇場唔忙呀   同阿花 Whatsapp 啦   今日阿怪又發顛   好大力拍枱幾下   今年已經第 3 次   都係毛重喺小說嗰位傾公事   究竟有咩得罪佢呢下 ?!

同阿花 1 點半傾到 5 點半   真係眼都濛埋   但時間就真係過得好快   哈哈 ~

放工即走   番到屋企都要預備晚餐   因為里奧大人都就嚟番到屋企呢 ~

是日晚餐 - 肉碎蒸豆腐 + 蔥花蛋炒飯

肉碎蒸豆腐 - 買咗 2 條脆肉瓜   又唔想分開蒸   所以用來墊底   咁樣真係唔錯喎   減少咗蒸嘢時間又洗少一隻碟   咁都諗到   我簡直係天才呀   哈哈哈哈 ~

蔥花蛋炒飯 - 之前食剩盒白飯   今晚炒飯啦   等里奧大人食得開心啲 ~

洗埋碗就即刻整沙律比家姐   佢又係好鍾意食我整嘅沙律   其實真係零難度   只係切蘋果粒先最花時間   今次材料係 3 個大富士蘋果 + 1 罐紅腰豆 + 1 罐粟米 + 1 罐椰果 + 3 條蟹柳 + 1 條青瓜   就咁食材都要百幾蚊   依家真係乜鬼都貴哂   係比以前貴一陪咁滯呀 ~

整咗成品就影比家姐睇啦   佢見到蟹柳勁開心   因為我特登唔話佢知有蟹柳嘛 

搞掂哂就即開機洗衫   之後就沖涼喇 ~

雖然聽日唔駛番工   但今晚好攰   所以 11 點半都瞓喇 ~