環遊世界 (薄批) + 炸雞 + 招牌肉醬意粉 (外賣) ( 22-JUN-2022 )

( 22-JUN-2022  WED )

尋晚瞓到 12 點幾   個肚有啲痛   所以想去沖個熱水涼   之後真係舒服好多   一覺瞓到里奧大人鬧鐵響   但我就繼續瞓到 7 點 45 分呢 ~

早餐食吞拿魚治烘底   真係好耐好耐無食喇 ~

菇場唔忙   明明番工前個肚無痛   點知一開工就痛   好在都頂到咋 ~

Lunch Time 就瞓   成 10 針鐘又瞓唔到   之後同阿齋傾下偈   差唔多 12 點 35 分先瞓   一瞓又瞓到 1 點 10 分 ~

抖陣就飲杯熱朱古力奶   個人叫做精神番少少 ~

里奧大人叫我兩星期唔好煮飯   咁等隻手可以抖下   我死都話要煮   但呢幾晚真係無本事煮呀   所以講嘢唔好咁肯定   哈哈 ~

佢都話我可能番工緊張   因為我番到屋企真係完全無事㗎喎   連阿齋都話我已經好耐無咁樣   因為我好多時都出街嘛 ~

3 點幾再沖多杯熱朱古力   但飲到一半已經好反胃   所以真係唔敢再飲   唉   嘥咗半杯添 ~

忙咗一個鐘又可以休息   做下嘢又好似好啲   可以分散下注意力   哈哈 ~

放工即走   番到屋企即叫外賣   里奧大人 6 點幾番到屋企   佢一沖涼   外賣就到   好多時都係咁   哈哈哈哈 ~

我同里奧大人講話番到屋企真係完全無嘢   沖完熱水涼係好精神   仲完全唔肚痛   里奧大人話可能番工緊張   始終喺屋企係隨時可以瞓   咁又係嘅   我呢幾晚食完真係好似灘屍咁   咩都無執㗎   里奧大人都知我唔舒服咗成日   會好自動自覺執嘢   唔駛我勞氣   哈哈 ~

食完就休息   睇電視睇到 10 點半都自己瞓先   呢排真係呢個時間就好眼瞓咁呢 ~