鳳城水餃 + 魷魚粒伴椰菜 + 蕃茄薯仔三文魚湯 ( 1-MAY-2023 )

( 1-MAY-2023  MON )

今朝 8 點幾醒咗   但里奧大人未起身   咁我又瞓唔到   所以用平版電腦睇嘢   其實都幾辛苦   哈哈 ~

里奧大人 9 點幾都起身   咁我都即刻整早餐喇 ~

早餐食芝士漢堡英式鬆餅   之前成日見到英式鬆餅   但當想買嘅時候   我去咗第 3 間超市先有呀   不過好想食   所以點都要搵囉   對食要有堅持   哈哈哈哈 ~

洗埋嘢就同里奧大人去萬寧買嘢   因為今日有 94 折   但經過花店又買咗 2 盆細盆栽   所以買埋瑞士卷都番屋企先   放低哂嘢再去萬寧   好在依家鍾意行咋 ~

我買完要再去另一間買其他嘢   所以叫里奧大人番屋企先 ~

買哂嘢諗住番屋企   但喺日本城見到電陶爐   諗住買比姑奶   但問下里奧大人啱唔啱先   之後佢話 OK   我哋又再去買喇喂 ~

終於買哂所有嘢   番到屋企要即沖涼抖下喇 ~

家姐話佢前面有嚿黑色嘢   哈哈

話咁快又到 1 點半   係時候煮午餐 lu ~

早啲飲湯   但其實夜晚仲有得飲   哈哈

牛肉漢堡

終於清哂啲燒賣   實在太開心

芒果千層糕   係我有生之年食過超級勁難食嘅甜品   腍 Pat Pat 到好似未熟咁   頭先我同里奧大人睇個樣好似好煙韌咁   所以佢話買啦   知我鍾意食嘛   點知

今次好難食喎   又係林嘅   真係唔會再有下次了

洗埋嘢就睇 Youtube   里奧大人就靈修   之後瞓晏覺 ~            

今朝影咗個豬柳漢堡比家姐睇   佢都鍾意食英式鬆餅嘅   所以佢話頭先都忍唔住買咗   之後又問我有無去惠康買嘢 ?!   我話依家就多數去惠康買嘢呀   佢話咁啱有兩張惠康 Coupon   可以下次比我   我話係咪咁啱呀 ?!   之前我多數去百佳   佢就咁啱有好多張百佳 Coupon 比我   真係笑死 ~

睇睇下 Youtube   到 5 點都頂唔順瞓咗   好在瞓到 5 點半起身咋 ~

差唔多 6 點半就預備晚餐   今晚好簡單   所以半個鐘就搞掂 ~

是日晚餐 - 鳳城水餃 + 魷魚粒伴椰菜 + 蕃茄薯仔三文魚湯

鳳城水餃 - 尋日買㗎   今晚點都要食   因為無放入冰格呢 ~

魷魚粒伴椰菜 - 終於清埋包急凍魷魚粒   我蘸壽司豉油同 Wasabi   勁正呀 ~ 

蕃茄薯仔三文魚湯 - 飲埋今晚就飲哂   不過下次都會再滾呢個湯   魚湯有益呀   我又少整魚喎 ~

洗埋碗就沖涼    休息一下就同里奧大人一齊睇 "鬼怪" ~

聽日要番工啦   所以 10 點 45 分都瞓覺   睇親韓劇都係咁上下時間瞓   因為追字幕好攰呀   哈哈 ~