焗手包墨魚卷 ( 13-MAY-2023 )

焗熱個朱古力麻糬比里奧大人當甜品

 ( 13-MAY-2023  SAT )

尋晚去完廁所   又諗起彬尼咁後生就走咗真係好可惜   所以又喊咗一陣   唉 ~

之後就發惡夢   有好大陣風吹開房門衝入嚟   我好肯定自己用盡力大叫咗 5 次 "神呀"   同埋我係貼住里奧大人咁叫   所以佢應該比我嚇醒咗   因為佢係輕輕力咁拍下我呢 ~

今朝食芝麻 & 芝士麻糬   焗熱真係好好味呀   外脆內煙韌   我喺玖拾買嘅   下次再試下甜餐包先 ~

菇場唔忙啦   又同阿花阿齋傾偈 ~

阿花又請我同里奧大人食蛋糕   話車銀優食過喎   真係比佢笑死

放工即走   約咗里奧大人喺地鐵站等   一時心急又去咗屯馬線   之後即行番樓梯上去啦   里奧大人話做咩咁遲嘅 ?!?!   哈哈 ~

同里奧大人食埋 Lunch   之後就 Join 九龍姑奶們去寵物善終店喇 ~

吉列豬扒定食 ($65) - 我最鍾意食便當   但我無諗過咁多飯   食剩 1/3 呀   最衰一陣唔係番屋企   唔係我每樣會食剩一半   可以留番今晚   咁樣唔駛食到咁飽

雙色芝士牛肉丼 ($54) - 里奧大人話都好多芝士同牛肉   如果芝士再燶啲   我覺得會好味啲

溫泉蛋 & 熱飲 (+$8) 

里奧大人幾經辛苦   將隻蛋慢慢移去中間   咁先影到咁正中咋   勁無聊   哈哈   

食完都走喇   因為儀式 3 點開始   不過大家都差唔多 2 點 40 分都到了 ~

今日係追思禮拜   所以時間要拿捏得好好 ~

本身叻叻係放喺梳化前面   梳化同枱係平放   咁樣都 OK   因為可以坐櫈嘛   之後儀式差唔多開始   就將張枱打直放   即係變咗 T 字型   其實我都唔明搬嚟做乜 ~

咁儀式完咗就影相啦   佢朋友叫佢哋揀位置影   我心諗駛咩揀呀   根本梳化位影最好   又有啲花   背景又 Pure   另一邊喺近門口   再另一邊就係影住有骨灰盅同裝飾 Display 嘅位置   點都唔會咁影呀嘛 ?!

所以根本坐梳化影係最好   駛咩搬枱同櫈去影呀 ?!   多此一舉   我同里奧大人都無出聲比意見   真心覺得唔該快啲搞掂就算   因為已經差唔多夠鐘   唔好阻住下一位客人嘛 ~

點知真係一夠鐘   職員已叫我哋離開   咁佢哋話比多陣時間   關門之後   水姑話比錢加多半個鐘   我心諗都神經病   加錢好巴閉呀 ?!   之後隔幾分鐘職員又叫我哋離開   佢哋又話好快好快   其實真係勁樣衰啦   之後又再過幾分鐘又入嚟   直頭有啲黑臉話個焚化爐已經開咗   咁佢哋就拿拿聲執好哂嘢   再搬好張枱回復原來位置   大佬   遲咗 10 分鐘先走呀 ~

雖然大家都好想望多陣叻叻   但妳咁諗人哋都咁諗   點解妳唔一早 Book 耐啲呢 ?!   但如果只得半個鐘就無話可說   不過妳自己可以揀另一間   唔係咩都旨意人   仲覺得好似遲咗無問題咁   真心覺得不知所謂   做人將心比己   如果排妳前面嘅人遲到   令到妳望少 10 分鐘   咁妳會點先 ?!

同埋睇咗 Rundown   妳都要 Count 住時間做嘢啦   唔係遲就比錢再 Book 多半個鐘   星期六日就乜嘢都最 Full 啦   因為多數齊人   唔係妳自己都唔揀星期六啦 ~

水姑佢哋等埋骨灰先走   咁我同里奧大人就帶佢哋去餐廳坐   之後我哋搭地鐵番屋企 lu ~

諗住買晚餐番屋企   但真係太飽   完全諗唔到想食咩   最後都係番屋企   我話求其睇冰格有咩就煮咩咁啦 ~

沖埋涼就開機洗衫   再煲羅漢果無花果雪梨茶   我本身只拎咗羅漢果無花果   但記得次次都係 3 樣材料   最後先醒起仲要加雪梨乾   哈哈 ~

搞掂就休息下   今日滕來滕去都幾攰 ~

今晚 8 點先食晚餐   煮個丁麵比里奧大人食   我就食拍青瓜算喇 ~

是日懶餐 - 焗手包墨魚卷

焗手包墨魚卷 - 完全唔記得冰格有呢個儲備   咁樣好過齋食睇仔嘛 ~

洗埋碗就沖涼   之後睇陣 Youtube 同食紫米露 ~

等埋里奧大人做完嘢就睇 1 集 "鬼怪"   真係好襟睇   哈哈 ~

今晚 11 點都瞓 lu   因為聽日要早起身呢 ~