清蒸紅鯖套餐 ($80) - 好食但比較多細骨
洋蔥爆牛肉套餐 ($65) - 都好食呀 同埋份量都幾多
金銀蛋浸時菜套餐 ($65) - 阿 Jack 話叫呢個餸 咁當然無問題啦
例湯
( 13-FEB-2026 FRI )
感恩一覺瞓天光呀 仲要係瞓到 7 點 21 分 祈完禱就啱啱鬧鐘響 真係 Perfect Time 呢 ~
今朝同里奧大人出去食早餐 食完就去佢公司坐陣先番工 ~
菇場忙呀 忙到 11 點 好在之後可以抖下 ~
前日同船頭傾偈 我話屋企有 30 年嘅陳皮 佢話沖茶都好飲㗎 所以就比呢 2 粒茶葉比我喇
11 點 45 分即走 今日里奧大人公司聚餐 所以我請半日假 比個驚喜阿妹呀 ~
佢哋 1 月話會有聚餐 佢已經叫里奧大人講話叫埋我 不過嗰時我仲諗緊去唔去 如果無咩人參加就唔去喇 ~
今次里奧大人部門只得古生無出席 而小米就成 Team 人都出席 加埋我就 13 個人 真係好難得咁齊人㗎 ~
每次部門一有聚餐 阿妹一定一定會叫埋我 其實佢同啲同事都熟啦 但唔知點解一定要叫埋我 所以里奧大人都話好奇怪 真係次次都要預埋我㗎喎 ~
里奧大人喺星期三晚話阿妹問我去唔去 ?! 佢叫阿妹自己問我 不過當晚佢無問呀 到星期四朝早問我嚟唔嚟 ?! 我都未答佢 佢已經話星期五見 咁我話我要番工 佢話接受唔到囉 ~
我同里奧大人講話唔想講大話 而事實上我星期五早上都要番工 我無呃佢㗎 哈哈 同埋叫佢唔好講我會出現 等佢哋拎咗 Pizza 入咗公司先話我知 我先入去 ~
一入去就見到叻叻 我用手勢 "殊" 之後再見到易姐又 "殊" 行到入房見到黑珍珠 佢好開心想講嘢 我即刻 "殊" 咁我都幫手灘開啲食物嘅 阿妹又好專注咁擺好啲食物 搞掂就枱頭望我嗰邊 之後望到我就大叫咗出嚟 個個都喺度笑 因為當時得佢一個望唔到我咋 哈哈 ~
開餐
頂爺整咗 2 盤沙律
阿妹同大餅一齊計㗎 有佢哋辦事真係最放心 佢哋會用哂啲優惠 因為佢哋本身都係會員 所以會將自己嘅優惠比埋出嚟呢 但星期四同五嘅 2 人餐就唔同價錢 好似要加多 $40
我同阿妹 榴槤 黑珍珠 頂爺係咁講嘢 里奧大人就同阿心傾偈 佢話我哋嗰邊好嘈呀 其實我哋 11 個女人喎 點會唔嘈呀 哈哈 ~
傾開玩機動遊戲 榴槤話鍾意玩過山車 又話唔鍾意玩賊船 之後黑珍珠話人哋叫做海盜船呀 真係笑死 我就硬係覺得個名好似唔係叫賊船嘛 ~
里奧大人請食午餐 不過就無喺群組講明 因為咁樣反而啲同事唔會嚟 所以今日佢部門加埋黑珍珠佢哋齊哂人 總共 13 人出席 所以超級開心呀 ~
今次聚餐 我確實好感受到佢哋係好錫我 咁我同阿妹 黑珍珠 榴槤係交心添嘅 唔係只係吃喝玩樂說說笑笑呢 我以前覺得無朋友都無咩所謂 依家覺得有朋友其實係好事 可以一齊分享同分擔 感覺真係差好遠㗎 ~
我哋都唔知食到幾點 但就肯定係遲咗開工 哈哈 ~
佢哋以為我食完就走 所以後尾見我仲喺度就好出奇 我話我請咗半日假呀 ~
我送比佢哋㗎 佢哋個個都好鍾意呀 里奧大人話估唔到我會送禮物 我話上星期已經買咗㗎喇 不過我諗住今日直接拎去呢
唔記得同阿妹傾開啲咩 佢話今朝里奧大人講同老婆食早餐係 $58 剩番兩蚊比佢 佢話蝕咗 $42 因為唔係比 $100 人哋找喎 ~
里奧大人即刻話有比家用 我話依家早午餐係我買埋整埋 都慳番唔少啦 比我賺下都好嘛 ~
家姐之前話佢同事都有家用 但佢老公買完嘢或者出去食飯 就會問番老婆攞錢 家姐話覺得好計較咁 因為姐夫唔會咁 好在里奧大人都唔會咁咋 所以家姐其中一個同事話 有時啲男人成日話鍾意喺屋企食飯 可能係唔想出街比錢食飯呀 講到似層層咁 哈哈 ~
3 點 20 分開始整理啲電線 差唔多 5 點先整好呀 啱啱好里奧大人放工 ~
我哋番屋企抖陣再出發去九龍灣同阿 Jack 食飯 咁 Ivy 走咗 如果番小組都一定會約埋佢食飯嘅 陪下佢傾偈都好吖 ~
阿 Jack 講去深圳大運嘅慘況 但我同里奧大人覺得好好笑 佢真係次次嘅經歷都好搞笑 好難想像係真人真事咁㗎 ~
食完就一齊番小組 今晚小組分享好開心呀 所以話咁快就 10 點 ~
阿妹幫我訂咗杏仁條同蛋散各 1 磅 咁我就同家姐 Share 喇
每次經過誠品都好想買太陽餅 但我食唔到咁多 里奧大人同家姐唔食 阿妹又話唔食 我唔想食到驚囉 所以唔會買 估唔到今晚有得食 感恩感恩
阿妹 Whatsapp 話今日見到我好有驚喜 我話我先搞笑 比驚喜係比同事唔係比個老公 哈哈 ~
沖埋涼就休息 今日全日係興奮狀態 咁無咁快眼瞓 ~
睇下 Youtube 今晚 11 點 40 分先瞓呀 ~
沒有留言:
發佈留言