( 17-FEB-2026 TUE 年初一 )
今朝一開手機就收到好多祝賀 我又要向佢哋祝賀 來來回回都覆咗 20 分鐘 所以遲咗出門口呀 ~
好在叻叻早到咗咋 因為去到已經無位 阿妹就遲到 好在無比佢知道我哋都遲到咋 哈哈 ~
食完就去里奧大人公司幫手 但其實今日無咩嘢做 咁就同 Mini 傾偈啦 估唔到佢講自己啲嘢比我聽 其實唔算同佢係好熟㗎咋 所以好感激佢信任我呢 ~
我 11 點半都走先 因為想睇下婆婆屋企附近有無餐廳開呀 估唔到全部無開 得番 2 間開咋 咁我再去巷仔睇下有無舖頭開 我見到有個戴口罩嘅女人行緊過嚟 仲一路行一路望住我 之後我再望真啲 原來係家姐嚟 嗰刻我碌大對眼叫咗一聲呀 話原來係妳 佢話以為我特登過嚟搵佢 我話唔係囉 哈哈 ~
同家姐一齊再行去搵餐廳 之後大食打嚟話到咗婆婆屋企附近 咁我話去食客飯間食店喇 反正剪髮表妹都話好 ~
坐低無耐 阿金表妹同個女都嚟埋 咁開始揀嘢食喇 我話我唔餓呀 叫咗 5 個餐先 唔夠再叫 ~
家姐同剪髮表妹都唔舒服 CC 又係 咁佢哋去咗旅行 CC 話本來 4 日飲 3 杯咖啡 但依家飲得 1 杯仲要 Share 之後里奧大人話 1 杯分 3 杯慢慢飲 感覺上就變為 3 杯啦 哈哈 ~
蔥爆牛肉 ($59) - 都幾好味
宮保雞丁 ($59) - 呢個好辣 個個都鍾意食 哈哈
重慶回鍋肉 ($59) - 呢個味道都唔錯
干鍋菜花 ($59) - 我無食呀 佢哋話有少少辣
豉汁蒸排骨 ($59) - 大食叫呢個餸 不過我無食呀
家姐走去埋單 阿金表妹即刻話比番錢 咁家姐當然唔會收啦 大表成日都係咁家嘛 哈哈 ~
剪髮表妹要去買咖啡 阿金女話個杯好得意 家姐即刻話就咁買個杯比佢 不過阿金話唔好 咁家姐都唔買敢買 lu ~
已經 1 點半喇 要快啲去婆婆屋企拜年喇 ~
Chiikawa 個杯係得意嘅 初初出 Chiikawa 我以為係舊公仔嚟㗎 剪髮表妹都係咁講 但我哋又講唔出似邊隻 哈哈
我哋一坐低就食金莎
婆婆買咗 1 Kg 芒果糖
剪髮表妹送比我嘅新年禮物 佢每年都好花心思去買新年禮物比表姐表妹㗎
我哋又繼續傾啦 之後大舅父同舅母都嚟咗 傾咗一陣就見到里奧大人 好在佢食埋午餐先嚟 唔係嚟到又無咩舖頭開 ~
大食表妹負責派利是 佢會講埋邊個派嘅 剪髮表妹就話一疊比哂咪得囉 咁其實都係 反正講完都唔記得 最搞笑係佢成日叫大食坐低啦 唔好阻住佢視線 哈哈 ~
大眼表妹一家同護士表妹同老公都嚟埋 咁就熱鬧好多喇 ~
講開揸車 剪髮表妹會揸車接啲客人去佢屋企 大舅父話剪髮表妹講咗一句說話記到依家 話表妹講坐 Harley 仲慢過坐巴士 表妹就話諗住坐 Harley 好快家嘛 之後舅父話自己一個人可以開得好快 但載多一個人就要講求安全 估唔到比佢咁樣話 哈哈 ~
剪髮表妹話有次好離譜 有架車行緊逆線仲要咇佢 嗰時佢睇緊手機無為意 我話其實好危險囉 ~
唔記得講開咩 阿金表妹話舅父着錯阿女補習老師對波鞋出去街市買餸 呢下真係笑爆咀呀 ~
之後佢又講佢上司播佛歌啲搞笑嘢 同埋成日要拜神 食乳豬食到驚 ~
又話有次佢上司個女因為某原因上唔到飛機 我哋話原來真有其事 之後我哋問佢後續呢 ?! 佢話唔敢問呀 哈哈 ~
剪髮表妹又鍾意睇 ASMR 同埋細路仔食嘢 但最鍾意係聽鬼故 我就講阿花喺酒店嘅經歷 但講講下變咗笑話咁聽 哈哈 ~
講開食嘢 佢都有去湘辣辣食嘢 但佢講嘅應該係辣湘湘 我以為佢去深圳 原來係去荃灣 所以我話下次約埋佢一齊食呀 ~
大舅父同大眼表妹護士表妹佢哋走先 但阿金就再繼續同我哋傾 傾到差唔多 5 點都走喇 ~
番到屋企抖陣就預備晚餐 里奧大人就熨衫 ~
喺家姐屋企拎咗啲瓜子 如果我唔自己拎 佢會比半包我㗎
叮噹
叫里奧大人食一個蛋糕 佢話好味呀 仲叫我比佢拎番公司食
剪髮表妹都唔知入面喺點 所以叫我開咗即刻影比佢睇呀
今年個個利是封都特別 不過我只係記得家姐嘅利是封 哈哈
芋頭糕都幾多芋頭粒
是日晚餐 - 芋頭糕拚蘿蔔糕 + 燒鴨 + 唐生菜
芋頭糕拚蘿蔔糕 - 里奧大人鍾意食煎糕 所以今晚都開鑊煎呢 ~
燒鴨 - 好在開雪櫃 唔係又唔記得食㗎喇 ~
唐生菜 - 食糕都好飽 所以淥 1 棵菜就夠 ~
洗埋碗就開機洗衫 之後沖涼休息 ~
同里奧大人一齊睇 "你的婚禮" 都幾好睇 ~
睇完再睇陣 Youtube 今晚 11 點半先瞓呢 ~
沒有留言:
發佈留言