十全十美 ( 15-FEB-2026 )

蠔豉生菜 (好事生財) / 茄汁蝦仁 (日日笑哈哈)

台灣蒜味香腸 (長食長有) / 燒鴨下莊 (食 duck 瞓 duck)

炒蝦子麵 (面面俱完美) / 笑口棗 (笑口常開)

豆沙煎堆 (金銀滿屋) / 提子汽酒 (有氣有力走)

車厘子 (紅運當頭) / 綠茶雪糕 (步步糕升)

平時成日見到真空包裝馬蹄   今日我行咗成個街市都唔見有   菜檔又係無   全部得番有皮嘅   但真係好想用馬蹄煮   所以都係要買包有皮嘅   我用生果刀切皮算喇   由大大粒切到細細粒   哈哈

我只煮咗 6 隻   因為主力食蠔豉生菜呀

將 1 條台灣腸剪開去   咁樣唔駛得 1 條咁核突   哈哈

焗 4 件就夠   但最後都無食到呀

呢度只係 1 個蝦子麵   煮埋都幾多咁

CC 比嘅笑口棗好香脆呀   呢啲真係可以食唔停

喺包點料理買㗎   $18/4 個都抵   本身諗住去另一間粥舖買   依家唔駛特登去買   感恩感恩

( 15-FEB-2026  SUN )

今朝同里奧大人一齊起身   但我係去同家姐食早餐嘅 ~

因為早到咗   我又搵 Berry 佢哋啦   咁我行喺 Berry 前面   我聽到 "dididada" 跑緊過嚟嘅腳步聲   之後見到佢好大力扯住 U 姐上前   再係咁撲我   好在條繩無甩到咋 ~

家姐行去掉垃圾就係咁望住家姐   平時叫佢又唔應人

同佢行咗半個鐘呀   送埋佢哋番屋企先去食早餐 ~

今朝又試另一間茶餐廳   最緊要冷氣夠   因為我頭先行到出汗呀 ~

食完去 759 買糖   家姐話要推車   我話推車就買唔到嘢㗎喇   點知家姐話真係買唔到糖   哈哈 ~

番到屋企又比 Berry 大力撲我   真係唔知點解咁肉緊   哈哈 ~

最鍾意睇全盒裝咗啲咩嘢

我一開咋   家姐就話比鳥結糖比我   我話要少少紅黑瓜子就得

家姐話條魚同啲花係人手畫㗎   我話只記得係 $2,500   之後佢即刻 "殊" 我呀   話姐夫唔知道幾錢㗎   好在我細細聲咋

我比新年利是比家姐 姐夫同 Berry   之後佢就比封生日利是比我   話驚唔記得比我   我話初一都見啦 ~

家姐比我嘅生日大利是   見佢係咁數利是封入面啲銀紙   我話妳比我幾多   妳生日就會收番咁多   之後佢啤住我   哈哈

同家姐又傾偈啦   咁一定要叫埋 Berry 陪我㗎 ~

我話今年未食團年飯呀   諗住嚟緊星期五食啦   點知貓貓夫人已經約咗家姐   之後到我 3 月先得閒   家姐話食唔食都得啦   但我話我想食   哈哈 ~

無啦啦又咬條牛骨

BB 樣

依家仲係圓碌碌

Berry 女全程比我攬住   仲瞓喺我隻手上面添呀   之後仲有埋鼻鼾聲   我哋係咁講嘢都唔醒   真係眼瞓得咁緊要 ?!

仍然眼瞓樣

家姐今晚去糟糟屋企食飯   所以要去酒樓買乳豬同燒鵝   咁我陪佢啦   可以幫手拎嘢嘛 ~

買完再去 Uny 買生果   買完就番屋企喇 ~

日本佐賀小姐士多啤梨 ($99) - 家姐同糟糟每人一盒

日本富有柿 ($26) - 都係家姐同糟糟每人一盒   咁我唔要任何生果嘛   我屋企仲有好多   之後家姐係都話要啦要啦   話大家都有嘛   不過我真係唔要囉   佢肯定驚我唔開心啦   咩都買比糟糟   但其實啲生果都係我同佢一齊揀嘅   如果唔開心就直頭叫佢唔好買比糟糟啦   哈哈

FUJIBAMBI 阿蘇牛乳蛋撻禮盒 ($47.9) - 我買比婆婆嘅新年禮物

雜錦麻糬波波 ($19/5 件) - 上次里奧大人話想食麻糬   不過驚太飽食唔落   所以今次見到就買比佢食喇

我揀散裝呀   因為我想買 1 個芝士麻糬波波 + 2 個抹茶紅豆麻糬波波 + 2 個朱古力麻糬波波

我最驚拎士多啤梨   一陣間論論盡盡跌落地就慘了

番到屋企放低哂所有嘢   家姐就要去何文田   同佢一齊搭地鐵   見到有兩母女一齊坐一齊睇手機喺度笑   之後個媽媽就讓位比個伯伯   個女就繼續睇手機   咁對母女係九龍灣落車嘅   個媽媽就一早企喺門口   但個女就停車先企身走   好似早一秒企身會蝕咁   我真係第一次見到呢啲情況咋   個女唔似唔舒服   因為全程都同媽媽有講有笑 ~

我去買豆沙煎堆同唐生菜   買完就去 AEON 睇下嘢   點知行行下搞肚痛   因為我唔會拎住啲食物入廁所嘛   我覺得好嘔心   本身諗住搭的士番屋企   但經過 Information Counter 見到有儲物櫃提供   咁就算要錢都會比   因為我反正搭的士都要錢   我問職員點樣先可以放入去儲物櫃 ?!   佢話有單先可以放   叫我買啲嘢就得㗎喇   我即刻去買罐生果酒呀   之後放哂嘢入儲物櫃就即去洗手間   好感恩隔離就係洗手間   我唔駛再搵呀 ~

難得唔駛拎住啲嘢行   我就行多陣超市先去拎番啲嘢   最後買埋兩餸飯同燒鴨就搭車去里奧大人公司喇 ~

生炒骨又係炸到好香脆   所以幾乎次次都係呢兩個餸   哈哈

里奧大人食完飯要開會   我就番屋企做就大清潔屋企 lu ~

燒鴨下莊 ($45) - 原來份量都唔少   咁第時唔駛買半隻喇

3 點收到公司群組話聽日放 1 點   實在太開心了 ~

搞掂都已經 5 點   里奧大人啱啱番到屋企   我開埋機洗衫就預備晚餐   所以叫佢去做機呀   我今日行咗 16,000 步好攰唔做喇 ~

是日晚餐 - 十全十美

十全十美 - 新年就搞啲花臣   湊夠 10 樣就搞掂   屋企勝在儲備多   所以好快搞掂   哈哈 ~

洗埋碗就沖涼休息   之後同里奧大人一齊睇 "中年好聲音 4" ~

睇完再睇多陣 Youtube   今晚10 點半都瞓覺喇 ~